ఏపీ ప‌రిపాల‌నా రాజ‌ధానిలో స‌ర్కార్ వారు..!

సూప‌ర్ స్టార్ మ‌హేష్ క‌థానాయ‌కుడిగా ప‌ర‌శురాం ద‌ర్శ‌క‌త్వంలో `స‌ర్కారు వారి పాట` తెర‌కెక్కుతోన్న సంగతి తెలిసిందే. క‌రోనా కార‌ణంగా వాయిదా ప‌డిన షూటింగ్ ఇటీవ‌లే తిరిగి ప్రారంభ‌మైంది. ఈ నేప‌థ్యంలో ఏపీ పరిపాల‌నా రాజ‌ధాని విశాఖప‌ట్ట‌ణంలో కొత్త షెడ్యూల్ పూర్తి చేయ‌డానికి యూనిట్ రెడీ అవుతోంది. ఈ షెడ్యూల్లో కొన్ని కీల‌క‌మైన యాక్ష‌న్ స‌న్నివేశాలు.. కొన్ని సాంగ్ మాంటేజ్ లు చిత్రీక‌రించ‌డానికి స‌న్నాహాలు చేస్తున్నారు. అయితే విశాఖ లో మ‌హేష్ సినిమా షూటింగ్ చేయ‌డం అన్న‌ది చాలా అరుదు. ఇంకా చెప్పాలంటే మ‌హ‌ష్ న‌టించిన సినిమాలేవి ఇప్ప‌టివ‌ర‌కూ వైజాగ్ లో షూటింగ్ జ‌రుపుకోలేదనే చెప్పాలి.

అయితే ఈసారి ఆ సెంటిమెంట్ ని బ్రేక్ చేసి మ‌హేష్ సినిమా `స‌ర్కారు వారి పాట` షూటింగ్ జ‌రుగుతుంది. ఇది ఎలా సాధ్యం అంటే? ఆస‌క్తిక‌ర సంగ‌తులే ఉన్నాయి. ఇక‌ విశాఖతో ద‌ర్శ‌కుడి ప‌ర‌శురాంకి ప్ర‌త్యేక‌మైన అనుబంధం ఉందని ఆయ‌న చాలాసార్లు చెప్పుకొచ్చారు. విశాఖ జిల్లా న‌ర్సీప‌ట్నం కుర్రాడిగా ఆయ‌న డైరెక్ట్ చేసే సినిమాలు ఎక్కువ‌గా వైజాగ్ లో షూటింగ్ లు జ‌రుగుతుంటాయి. కెరీర్ ఆరంభంలో తెర‌కెక్కించిన యువ‌త సినిమా షూటింగ్ అక్క‌డే జ‌రిగింది. అలాగే సోలో- సారోచ్చారు- గీతా గోవిదం సినిమాలు వైజాగ్ లో కీల‌క స‌న్నివేశాల్ని చిత్రీక‌రించారు. ఇప్పుడ‌దే వేవ్ లో స‌ర్కార్ వారి పాట కోసం ఓ షెడ్యూల్ ప్లాన్ చేసిన‌ట్లు తెలుస్తోంది.

అయితే ఈ షెడ్యూల్ మ‌రో 15 రోజుల్లో ప్రారంభం కానుంద‌ని స‌మాచారం. ప్ర‌స్తుతం వైజాగ్ లో క‌రోనా సెకెండ్ వేవ్ ప‌రిస్థితులు కూడా అదుపులోకి వ‌చ్చాయి. కేసుల సంఖ్య త‌గ్గింది. కొన్ని సినిమా షూటింగ్ లు కూడా విశాఖ‌లో జ‌రుగుతున్నాయి. భ‌విష్య‌త్ లో ఏపీ టాలీవుడ్ విస్త‌రించేది ఈ న‌గ‌రంలోనే. విశాఖ‌- అర‌కు బెల్ట్ లో 80శాతం షూటింగులు చేసేందుకు ద‌ర్వ‌క‌నిర్మాత‌లు ఆస‌క్తిగా ఉంటారన్న సంగ‌తి తెలిసిందే.