తమిళ సర్కార్ వచ్చేశాడు!!

రజినీకాంత్ తర్వాత తమిళనాట విపరీతమైన క్రేజ్ ఉన్న స్టార్ హీరో ఎవరు అనే ప్రశ్న వేస్తే.. ఇలయ దళపతి విజయ్ అనే అంటారు కోలీవుడ్ జనాలు. సినిమాలో కంటెంట్.. మాస్-క్లాస్.. హిట్టు-ఫ్లాపులతో సంబంధం లేకుండా వందల కోట్ల వసూళ్లను రాబట్టడం విజయ్ కు మాత్రమే చెల్లిన విద్య. కాసింత బాగుందంటే చాలు కలెక్షన్స్ వర్షం కురిసిపోతుంది.

విజయ్ కు మురుగదాస్ కాంబినేషన్ తో మంచి సక్సెస్ ట్రాక్ రికార్డ్ ఉంది. గతంలో వీరిద్దరి కాంబినేషన్ లో వచ్చిన తుపాకి.. కత్తి బ్లాక్ బస్టర్లుగా నిలిచాయి. తుపాకి మూవీ తెలుగులో డబ్ అయి మంచి విజయం సాధించగా.. కత్తి చిత్రాన్ని తెలుగులో ఖైదీ నంబర్ 150 అంటూ మెగాస్టార్ రీమేక్ చేసిన సంగతి తెలిసిందే. ఇప్పుడు విజయ్-మురుగ కాంబినేషన్ లో వస్తున్న మూడో చిత్రం అప్ డేట్స్ వైరల్ అవుతున్నాయి. ఇప్పటివరకూ సినిమా రూపొందుతోందనే విషయం తప్ప మరో అప్ డేట్ లేదు. కానీ రేపు అంటే జూన్ 22న విజయ్ పుట్టిన రోజు సందర్భంగా.. సినిమా టైటిల్ తో పాటు ఫస్ట్ లుక్ ను కూడా రిలీజ్ చేశారు.

విజయ్ కొత్త సినిమా పేరేంటో తెలుసా.. 'సర్కార్'. పేరులోనే ఎంత పవర్ ఉందో.. ఫస్ట్ లుక్ ను అంతకంటే ఎక్కువ శక్తివంతంగానే రూపొందించారు. నోటిలో సిగరెట్.. బ్యాక్ గ్రౌండ్ లో చెన్నై మహానగరం.. నల్ల కళ్లద్దాలు.. అక్కడక్కడా తెల్ల వెంట్రుకలు కనిపిస్తున్న గెడ్డం లుక్ లో విజయ్ మరీ సూపర్బ్ గా ఉన్నాడు. ఫ్యాన్స్ కు బర్త్ డే గిఫ్ట్ గా విడుదల చేసిన ఈ ఫస్ట్ లుక్.. సోషల్ మీడియాలో వైరల్ అయిపోయింది. కీర్తి సురేష్ హీరోయిన్ గా నటిస్తున్న సర్కార్ మూవీకి ఏఆర్ రెహమాన్ సంగీతం అందిస్తున్నాడు.