ఆచార్యపై గౌరవంతో ఆగుతున్న సర్కారు వారు!

మెగాస్టార్‌ చిరంజీవి ఆచార్య సినిమా ఈ వారంలో ప్రేక్షకుల ముందుకు రాబోతుంది. మరో వైపు మరో రెండు వారాల్లో సూపర్ స్టార్‌ మహేష్ బాబు నటించిన సర్కారు వారి పాట సినిమా కూడా విడుదలకు సిద్దంగా ఉంది. సర్కారు వారి పాట సినిమా విడుదల తేదీ దగ్గర పడుతున్నా కూడా ఇప్పటి వరకు ప్రమోషన్ కార్యక్రమాల జోరు పెంచలేదు. దాంతో మహేష్ బాబు అభిమానులు దర్శకుడు పరశురామ్‌ పై మరియు నిర్మాతలపై అసంతృప్తి వ్యక్తం చేస్తున్నారు.

ఈమద్య కాలంలో సినిమా విడుదల తేదీకి కనీసం మూడు నాలుగు వారాల నుండే హడావుడి మొదలు పెడుతున్నారు. కాని సర్కారు వారి పాట సినిమా విడుదలకు మరో రెండు వారాల సమయం మాత్రమే ఉంది. అయినా కూడా ఇంకా ఎలాంటి హంగామా లేదు. పైగా ఈ సమయంలో మహేష్ బాబు దుబాయి కి వెళ్లడం మరింతగా చర్చనీయాంశం అయ్యింది. అసలు సర్కారు వారి పాట సినిమా ప్రమోషన్ విషయంలో ఎందుకు ఇంత అలసత్వం అంటూ అభిమానులు ఆగ్రహంతో ఉన్నారు.

ఈ సమయంలో చిత్ర యూనిట్‌ సభ్యులు మరియు మహేష్ బాబు సన్నిహితుల నుండి అందుతున్న సమాచారం ప్రకారం ఆచార్య సినిమా విడుదలకు సిద్దంగా ఉన్న కారణంగానే సర్కారు వారి పాట సినిమా ప్రమోషన్ ను నిర్వహించడం లేదు. సర్కారు వారి పాట సినిమా ప్రమోషన్ కార్యక్రమాలు మొదలు పెడితే ఆచార్య పై ప్రభావం ఎంతో కొంత ఉంటుంది అనేది విశ్లేషకుల అభిప్రాయం. అందుకే మహేష్ బాబు సర్కారు వారి పాట ప్రమోషన్ కార్యక్రమాలు ఆలస్యం చేస్తున్నారు.

ఆచార్య విడుదల అయిన వెంటనే మహేష్ బాబు ప్రమోషన్ కార్యక్రమాల్లో పాల్గొంటాడు. కేవలం మహేష్ బాబు మాత్రమే కాకుండా హీరోయిన్ కీర్తి సురేష్ మరియు దర్శకుడు పరశురామ్‌ నిర్మాతలు ఇతర యూనిట్‌ సభ్యులు అంతా కూడా మీడియా ముందుకు వస్తారని తెలుస్తోంది. ఆచార్య సినిమాకు కొరటాల శివ దర్శకత్వం మరియు చిరంజీవి హీరో అవ్వడం వల్ల మహేష్ బాబు గౌరవంతో తన సినిమా ప్రమోషన్ కార్యక్రమాలను ఆలస్యం చేస్తున్నట్లుగా తెలుస్తోంది.

ప్రమోషన్‌ కార్యక్రమాల జోరు జెట్‌ స్పీడ్ గా ఆచార్య నిర్వహిస్తున్నారు. అతి త్వరలోనే సర్కారు వారి పాట నుండి ట్రైలర్ ను విడుదల చేయబోతున్నట్లుగా చిత్ర యూనిట్‌ సభ్యులు ప్రకటించారు. ఆచార్య సినిమా తో పాటు సర్కారు వారి పాట సినిమా ట్రైలర్ వస్తే బాగుంటుందని సినీ వర్గాల వారు అభిప్రాయం వ్యక్తం చేస్తున్నారు. మరి ఆ విషయం పై మహేష్‌ ఎలా స్పందిస్తాడు అనేది చూడాలి.