పవర్ స్టార్ వదిలిన సోల్ ఫుల్ 'శశి' ట్రైలర్..!

యువ కథానాయకుడు ఆది సాయికుమార్ నటిస్తున్న తాజా చిత్రం ''శశి''. ఇందులో ఆది సరసన సుర‌భి కథానాయికగా నటిస్తోంది. ఈ లవ్ అండ్ యాక్షన్ ఎంటర్టైనర్ ని కొత్త దర్శకుడు శ్రీ‌నివాస్ నాయుడు న‌డిక‌ట్ల తెరకెక్కిస్తున్నాడు. శ్రీ హ‌నుమాన్ మూవీ మేక‌ర్స్ బ్యాన‌ర్‌ పై ఆర్‌.పి.వ‌ర్మ - సి.రామాంజ‌నేయులు - చింత‌ల‌పూడి శ్రీ‌నివాస్ సంయుక్తంగా ఈ చిత్రాన్ని నిర్మిస్తున్నారు. కరోనా లాక్ డౌన్ కారణంగా వాయిదా పడుతూ వచ్చిన ఈ చిత్రాన్ని మార్చి 19న థియేటర్స్ లో విడుదల చేయడానికి సన్నాహాలు చేస్తున్నారు. ఈ నేపథ్యంలో ఇప్పటికే విడుదలైన 'ఒకే ఒక లోకం నువ్వే' సాంగ్ మరియు మెగాస్టార్ చిరంజీవి వదిలిన టీజర్ మంచి స్పందన తెచ్చుకున్నాయి. ఈ క్రమంలో తాజాగా పవర్ స్టార్ పవన్ కళ్యాణ్ చేతుల మీదుగా 'శశి' ట్రైలర్ రిలీజ్ చేయబడింది.

'మనం ప్రేమించే వాళ్ళు మన పక్కన ఉంటే ఎంత ధైర్యంగా ఉంటుందో.. ప్రమాదంలో ఉన్నప్పుడు అంతే భయంగా ఉంటుంది' అని ఆది చెప్పే డైలాగ్ తో ట్రైలర్ ప్రారంభమైంది. ఇందులో ఆది సాయి కుమార్ లుక్ కొత్తగా ఉంది. ఇదొక రగ్డ్ లవ్ స్టోరీ అనిపిస్తోంది. 'మనం ఏదైనా సాధించాలనుకున్నప్పుడు, ముందు మన బలహీనతలను గెలవాలి' 'ప్రేమంటే లేని చోట వెతుక్కోవడం కాదు.. ఉన్న చోట నిలబెట్టుకోవడం' 'ప్రేమించిన వాడితో పెళ్లి చేయకుండా.. పెళ్లి చేసిన వాడితో ప్రేమగా ఉంటుందనుకోవడం మీ మూర్ఖత్వం' వంటి సంభాషణలు ఆకట్టుకున్నాయి. ఇక ఈ చిత్రంలో యాక్షన్ పాళ్లు కూడా ఎక్కువే అని అర్థం అవుతోంది. మొత్తం మీద పవర్ స్టార్ వదిలిన ఈ పవర్ ఫుల్ ట్రైలర్ డైలాగ్స్ యాక్షన్ సీక్వెన్స్ లతో ఆడియన్స్ ని అలరిస్తోంది.

'శశి' చిత్రానికి అరుణ్ చిలువేరు సంగీతం సమకూరుస్తున్నారు. అమ‌ర్‌ నాథ్ బొమ్మిరెడ్డి సినిమాటోగ్రఫీ అందించగా.. సత్య ఎడిటింగ్ వర్క్ చేస్తున్నారు. ఇక ఈ చిత్రంలో రాశీ సింగ్ - రాజీవ్ క‌న‌కాల‌ - వెన్నెల కిశోర్‌ - తుల‌సి - జ‌య‌ప్రకాష్‌ - అజ‌య్‌ - వైవా హ‌ర్ష - సుద‌ర్శన్‌ ఇతర ప్రధాన పాత్రల్లో కనిపిస్తున్నారు. కొన్నాళ్లుగా సరైన హిట్ కోసం ఎదురు చూస్తున్న ఆదికి 'శశి' ఎలాంటి సక్సెస్ అందిస్తుందో చూడాలి.