అందుకే మెహరీన్ ను తీసుకున్నారట!

సంక్రాంతి రేసులో విడుదల అవుతున్న చివరి సినిమా ఎంత మంచివాడవురా. ఇప్పటికే విడుదలైన రజనీకాంత్ దర్బార్.. మహేశ్ బాబు సరిలేరు నీకెవ్వరు.. బన్నీ అల వైకుంఠపురములో చిత్రాలన్ని పాజిటివ్ టాక్ సొంతం చేసుకున్న వేళ.. ఫీల్ గుడ్ మూవీ ఇమేజ్ లో ప్రేక్షకుల ముందుకు వస్తున్న కల్యాణ్ రామ్ చిత్రం మీద అంచనాలు ఎక్కువగానే ఉన్నాయి.

దర్శకుడు స‌తీశ్ వేగేశ్న‌ దర్శకత్వంలో ప్రముఖ మ్యూజిక్ సంస్థ అయిన ఆదిత్యా సంస్థ చిత్ర నిర్మాణంలో అడుగుపెట్టటం.. తమ మొదటి సినిమాను కల్యాణ్ రామ్ తో నిర్మించాలని డిసైడ్ అయ్యారు. ఇదో విశేషమైతే.. కల్యాణ్ రామ్ అన్నంతనే యాక్షన్ చిత్రాలు గుర్తుకొచ్చే దానికి భిన్నంగా ఆయనతో ఫ్యామిలీ మూవీని నిర్మించటం మరో విశేషంగా చెప్పాలి.

కథ చిన్నదే అయినా.. చెప్పిన తీరుతో ప్రేక్షకులను మెప్పించొచ్చే నమ్మకంతో ఉన్నారు దర్శకులు. గుజరాతీ చిత్రమైన ఆక్సిజన్ ను మన నేటివిటికీ తగ్గట్లుగా మార్చి తీసిన ఈ సినిమాలో మెహరీన్ ను హీరోయిన్ గా ఎంపిక చేసుకోవటానికి కారణాన్ని చెప్పుకొచ్చారు దర్శకుడు సతీశ్.

ఎఫ్ 2 చిత్రంలో మెహరీన్ చక్కటి కామెడీ చేసిందని.. అదే ఆమెకు ఈ సినిమాలో చాన్స్ వచ్చేలా చేసిందని చెప్పారు. కామెడీ బాగా చేసే వారు ఎమోషన్స్ ను కూడా బాగా పండిస్తారని.. అందుకే తమ చిత్రంలో మెహరీన్ కు అవకాశమిచ్చినట్లు చెప్పారు. దర్శకుడి మాట చూస్తుంటే.. ఈ చిత్రంలోనూ మెహరీన్ కామెడీ ప్రధానంగా ఉంటుందన్న భావన కలగటం ఖాయం.