నేను చాలా లక్కీ అంటున్న మల్లూ భామ..

టాలీవుడ్ లో మరో కొత్త మలయాళీ భామ సందడి చేయనుంది. ఇప్పటికే ఇండస్ట్రీలో చాలామంది మల్లూవుడ్ భామలు సందడి చేస్తుండగా, కీర్తి సురేష్ రీసెంట్ గా ఎంట్రీ ఇచ్చింది. త్వరలో అనుపమా పరమేశ్వరన్ కూడా టాలీవుడ్ ని ఎటాక్ చేయనుంది. ఇప్పుడీ లిస్ట్ లోకి సాట్నా టైటస్ కూడా చేరిపోయింది.

మొదట మలయాళం సినిమాల తర్వాత కోలీవుడ్ లో ఎంట్రీ ఇచ్చింది ఈ సుందరాంగి. చివరగా పిచ్చైక్కరన్ అనే సినిమాలో కనిపించింది. తెలుగులో నారా రోహిత్ మూవీ 'నీది నాది ఒకే కథ' మూవీతో అరంగేట్రం చేయనుంది. 'నేను అన్ని భాషల్లో ప్రముఖ నటులతో కలిసి అరంగేట్రం చేస్తున్నాను. ఇలాంటి అరుదైన అవకాశం అందరికీ రాదు. యాక్టర్-ప్రొడ్యూసర్ విజయ్ యాంటోనీతో కోలీవుడ్ లో అడుగు పెట్టగా, తెలుగులో నారా రోహిత్ సినిమా నాకు మొదటి చిత్రం కావడం అదృష్టమే. కెరీర్ ప్రారంభంలోనే ఇలా పాపులర్ యాక్టర్లతో చేసే అవకాశం రావడం నేను లక్కీ అనుకుంటున్నాను' అని చెప్పింది సాట్నా.

నారా రోహిత్ మూవీ నీది నాది ఒకే కథలో.. శ్రీవిష్ణుకు జంటగా ఈ మలయాళీ భామ కనిపిస్తోంది. 'ఇదో ఫ్రెష్ లవ్ స్టోరీ. ఇప్పటికే చాలా భాగం షూటింగ్ పూర్తయిపోయింది. విష్ణుకు జంటగా నటించడాన్ని నేను చాలా ఎంజాయ్ చేశాను' అని చెప్పిన సాట్నా టైటస్.. నారా రోహిత్ తోపాటు యూనిట్ అంతా ఎంతో మద్దతుగా నిలిచారని చెప్పుకొచ్చింది.