'గాడ్ ఫాద‌ర్' త‌ర్వాత స‌త్య‌దేవ్ ప‌రిస్థితి ఇదీ

బ‌హుభాషా చిత్రాల ట్రెండ్ కొన‌సాగుతోంది. ఒకేసారి రెండు మూడు భాష‌ల్లో సినిమాల‌ను విడుద‌ల చేసేందుకు అవ‌స‌ర‌మైన కంటెంట్ కాస్టింగ్ కోసం వెతుకుతున్నారు మ‌న ఫిలింమేక‌ర్స్. అదే పంథాలో ఇప్పుడు నేటిత‌రం ప్ర‌తిభావంతుడు స‌త్య‌దేవ్ మ‌రో ప్ర‌య‌త్నం చేస్తున్నాడు.

టాలీవుడ్ టాలెంటెడ్ హీరో సత్యదేవ్- కన్నడ స్టార్ డాలీ ధనంజయతో కలిసి ఈశ్వర్ కార్తీక్ దర్శకత్వంలో కొత్త సినిమా కోసం పనిచేస్తున్నారు. ఓల్డ్ టౌన్ పిక్చర్స్ బ్యానర్ పై బాల సుందరం- దినేష్ సుందరం ఈ చిత్రాన్ని నిర్మిస్తున్నారు. క్రిమినల్ యాక్షన్ ఎంటర్ టైనర్ గా రూపొంద‌నున్న‌ ఈ చిత్రం ఇద్దరు ప్రధాన పాత్రలకు సంబంధించిన 26వ ప్రాజెక్ట్.

తమిళ నటి ప్రియా భవానీ శంకర్ కి నాయికా అవకాశం కల్పించామ‌ని మేకర్స్ వెల్లడించారు. ఈ సినిమా ద్వారా ప్రియా భవానీ శంకర్ తెలుగు తెరకు పరిచయం అవుతోంది. ఆమె ఇటీవలి బ్లాక్ బస్టర్ `తిరు` సహా అనేక తమిళ చిత్రాలలో న‌టించినా ఇది మొదటి స్ట్రెయిట్ తెలుగు చిత్రం కానుంది.

ఈ చిత్రంలో ప్రియా ఫ్యాషన్ డిజైనర్ గా కనిపించనుంది. ప్రస్తుతం రెగ్యులర్ షూటింగ్ జరుగుతోంది. చరణ్ రాజ్ మ్యూజిక్ కంపోజర్ కాగా.. మీరాఖ్ డైలాగ్స్ రాశారు. ఇద్దరు ప్రతిభావంతులైన నటులు సత్యదేవ్ - ధనంజయలను ఒకే ఫ్రేమ్‌లో చూడటం థ్రిల్లింగ్ గా ఉంటుంది. గాడ్ ఫాద‌ర్ చిత్రంలో మెగాస్టార్ తో క‌లిసి న‌టించి స‌త్య‌దేవ్ ఆక‌ట్టుకున్నాడు. విల‌న్ గాను అత‌డు న‌టించి మెప్పించ‌డం ఆస‌క్తిక‌రం. `గాడ్ ఫాద‌ర్` త‌ర్వాత స‌త్య‌దేవ్ ద్విభాషా చిత్రానికి ప్లాన్ చేయ‌డం స‌రైన నిర్ణ‌య‌మేన‌ని ప్ర‌శంసించాలి.