ఇంకో శ్రుతి హాసన్ అవుతుందా?

ఒక హీరోయిన్ మూడు భాషల్లో నటించిన తొలి సినిమాలు ఫ్లాప్ అయితే ఎలాంటి ముద్ర పడుతుందో చెప్పేదేముంది. ఐరెన్ లెగ్.. ఐరెన్ లెగ్ అంటూ వాయించేస్తారు. కమల్ హాసన్ తనయురాలు శ్రుతి హాసన్ ఇలాంటి అనుభవాన్నే ఎదుర్కొంది. హిందీలో ఆమె నటించిన తొలి సినిమా ‘లక్’తో పాటు తెలుగులో.. తమిళంలో నటించిన అరంగేట్ర సినిమాలు ‘అనగనగా ఓ ధీరుడు’.. ‘సెవన్త్ సెన్స్’ ఫ్లాప్ అయ్యాయి. ఆమెను అందరూ ఐరెన్ లెగ్ అనే అన్నారు. కానీ ‘గబ్బర్ సింగ్’తో ఆమె దశ తిరిగిపోయింది. ఆమే తర్వాత అదృష్ట జాతకురాలిగా మారిపోయింది. ఇప్పుడు ముంబయి భామ సాయేషా కూడా శ్రుతి లాగే పేరు తెచ్చుకుంటుందేమో చూడాలి.

తెలుగులో సాయేషా తొలి సినిమా ‘అఖిల్’ డిజాస్టర్ అయిన సంగతి తెలిసిందే. హిందీలో ఆమె ఫస్ట్ మూవీ ‘శివాయ్’ ఫ్లాపవగా.. తమిళంలో నటించిన ‘వనమగన్’ కూడా ఆడలేదు. అలాగని ఆమెకేమీ అవకాశాలు ఆగిపోలేదు. తమిళంలో విలక్షణ నటుడు విజయ్ సేతుపతి సరసన ఓ పెద్ద సినిమా చేసే అవకాశం సాయేషాను వరించింది. ‘కాష్మోరా’ డైరెక్టర్ గోకుల్ ఈ చిత్రాన్ని రూపొందించనున్నాడు. ఈ చిత్రానికి ‘జుంగా’ అనే టైటిల్ పెట్టారు. ఈ చిత్రాన్ని దాదాపు పూర్తిగా పారిస్ లోనే చిత్రీకరిస్తారట. త్వరలోనే విజయ్-సాయేషా ఫ్రాన్స్ బయల్దేరుతున్నారు. మరోవైపు ప్రభుదేవా దర్శకత్వంలో విశాల్-కార్తి హీరోలుగా నటించే సినిమాలోనూ సాయేషా చేయాల్సింది. కానీ ఆ సినిమా అనివార్య కారణాల వల్ల ఆగిపోయింది. మరి శ్రుతికి ‘గబ్బర్ సింగ్’ లాగా.. సాయేషా కెరీర్ కు ‘జుంగా’ ఉపయోగపడుతుందేమో చూడాలి.