'సెబాస్టియన్' న్యూ రిలీజ్ డేట్ ఇదే!

యంగ్ హీరోలంతా వరుస ప్రాజెక్టులను పట్టాలెక్కించే పనిలో పడ్డారు. ఒక సినిమా తరువాత ఒక సినిమా ఒప్పుకునే పరిస్థితి ఇప్పుడు లేదు. ఒకేసారి మూడు నాలుగు ప్రాజెక్టులు చేస్తున్నారు. ఏడాదికి ఒక సినిమా మాత్రమే చేస్తే .. అది కాస్తా ఫ్లాప్ అయితే మళ్లీ ప్రేక్షకుల ముందుకు రావడానికి చాలా సమయం పడుతుంది.

ఈ లోగా ఆ ఫ్లాప్ బరువును అలా మోస్తూ ఉండవలసిందే. అలా కాకుండా ఏడాదికి కనీసం మూడు సినిమాలు చేస్తే, ఒక సినిమా పోతే ఒకటైనా ఆదుకుంటుంది. జనం కూడా ఫ్లాప్ సినిమాను తొందరగా మరిచిపోతారు.

టాలీవుడ్లో ఏడాదికి మూడు సినిమాల పాలసీని రవితేజ .. నాని తప్పకుండా ఆచరణలో పెడుతుంటారు. మిగతా హీరోలు కూడా ఇప్పుడు ఇదే పద్ధతిని ఫాలో కావడానికి ప్రయత్నిస్తున్నారు. అలాంటి యంగ్ హీరోల్లో కిరణ్ అబ్బవరం ఒకరు. 'రాజావారు రాణిగారు' .. 'ఎస్.ఆర్. కల్యాణ మంటపం' సినిమాలు బాగా ఆడటంతో ఈ హీరో యూత్ కి బాగానే చేరువయ్యాడు.

ఇప్పుడు ఆయన చేతిలో అరడజను సినిమాలు ఉన్నాయి. ఆ సినిమాల్లో ఒకటిగా ప్రేక్షకుల ముందుకు రావడానికి 'సెబాస్టియన్ PC 524' సిద్ధమవుతోంది.

రాజు - ప్రమోద్ నిర్మించిన ఈ సినిమాకి బాలాజీ సయ్యపురెడ్డి దర్శకత్వం వహించాడు. కిరణ్ అబ్బవరం సరసన నాయికలుగా నువేక్ష .. కోమలి ప్రసాద్ కనువిందు చేయనున్నారు. ఒక ముఖ్యమైన పాత్రలో రోహిణి కనిపించనుంది. గిబ్రాన్ సంగీతాన్ని సమకూర్చిన ఈ సినిమాను ఈ నెల 25వ తేదీన విడుదల చేయాలనుకున్నారు.

అయితే పవన్ కల్యాణ్ కథానాయకుడిగా రూపొందిన 'భీమ్లా నాయక్'ను ఈ నెల 25వ తేదీనే రంగంలోకి దింపుతున్నారు. దాంతో ఆ రోజున రావలసిన 'ఆడవాళ్లు మీకు జోహార్లు' 'గని' సినిమాలు వాయిదా పడ్డాయి.

అలాగే 'సెబాస్టియన్' సినిమా కూడా వాయిదా పడింది. మార్చి 4వ తేదీన ఈ సినిమాను విడుదల చేయనున్నట్టు ప్రకటించారు. అందుకు సంబంధించిన అధికారిక పోస్టర్ ను రిలీజ్ చేశారు. ఈ సినిమాలో రేచీకటితో బాధపడే ఒక పోలీస్ కానిస్టేబుల్ పాత్రలో కిరణ్ అబ్బవరం కనిపించనున్నాడు.

తన లోపం గురించి ఎవరికీ తెలియకుండా ఉండటం కోసం ఆయన నానా తంటాలు పడుతుంటాను. అలాంటి పరిస్థితుల్లో ఆయన ఒకసారి నైట్ డ్యూటీ చేయవలసి వస్తుంది. అప్పుడు ఏం జరిగిందనేదే కథ. ఈ సినిమా ఏ స్థాయిలో ప్రేక్షకులను ఆకట్టుకుంటుందో చూడాలి మరి.