ట్రైలర్ టాక్: హ్యాట్రిక్ హీరో మళ్లీ కొట్టేట్లున్నాడే

టీజర్ జస్ట్ ఓకే అనిపించింది కానీ.. ట్రైలర్ చూస్తే మాత్రం రాజ్ తరుణ్ ఖాతాలో మరో హిట్టు పడుతుందేమో అన్న ఫీలింగే కలుగుతోంది. నిన్న ‘సీతమ్మ అందాలు రామయ్య సిత్రాలు’ ఆడియో ఫంక్షన్లో విడుదల చేసిన ట్రైలర్ అందరినీ ఆకట్టుకుంది. ‘సినిమా చూపిస్త మావ’ తరహాలో యూత్ ఫుల్ మాస్ ఎంటర్టైనర్ గా ఈ సినిమాను తెరకెక్కించినట్లున్నారు. ఈ ట్రైలర్ కు రాజ్ తరుణే ప్రధాన ఆకర్షణ అని వేరే చెప్పాల్సిన పని లేదు. వరుసగా మూడు హిట్లు కొట్టిన ఉత్సాహం, కాన్ఫిడెన్స్ ఈ ట్రైలర్లో అడుగడుగునా కనిపిస్తున్నాయి. గోదావరి యాసలో రాజ్ మరోసారి రెచ్చిపోయినట్లే కనిపిస్తున్నాడు. హీరోయిన్ ఆర్తన యావరేజ్ గా కనిపిస్తుండగా.. ట్రైలర్ అంతా రాజ్ తరుణే డామినేట్ చేశాడు.

‘‘చిన్నప్పుడు క్రికెట్ చూశాక సచిన్ అవ్వాలనుకున్నా. సినిమా చూశాక హీరో అవ్వాలనుకున్నా. కానీ అప్పట్నుంచి ఇప్పటిదాకా సీతామాలక్ష్మికి మొగుడవ్వాలనుకున్నాను’’ అనే డైలాగ్ తో ట్రైలర్ మొదలై.. పంచ్ ల మీద పంచ్ లతో సాగిపోయింది. షకలక శంకర్ ట్రైలర్లోనే చెలరేగిపోయాడు. ‘‘నీ లవ్ వన్ సైడా.. టూ సైడా.. లేక సూసైడా.. ఈ రోజు తేలిపోవాల్సిందంతే’’... ‘‘వీడేం మారలేదు. అప్పుడూ ఎదవే.. ఇప్పుడూ ఎదవే’’ అనే పంచ్ డైలాగులు బాగా పేలాయి. హీరోను అతడి తల్లి తిడితే.. ‘‘సినిమాలో హీరోలు కూడా నాలాగే ఫస్టాఫ్ లో ఖాళీగా ఉంటారే.. సెకండాఫ్ లో బిజీ అయిపోతారు’’ అనే డైలాగ్ జనాలకు బాగా కనెక్టయ్యేలా ఉంది. మొత్తంగా ట్రైలర్ అంతా కూడా ఫన్నీ ఫన్నీగా సాగిపోతూ ‘సినిమా చూపిస్త మావ’ తరహాలోనే సినిమా కొంచెం రొటీన్ గా ఉంటూనే మినిమం గ్యారెంటీ వినోదాన్నందిస్తుందన్న అభిప్రాయం కలిగించింది. మరి ఈ నెలాఖర్లో ప్రేక్షకుల ముందుకు రాబోయే ‘సీతమ్మ అందాలు రామయ్య సిత్రాలు’ ఎలాంటి ఫలితాన్నందుకుంటుందో చూద్దాం.