మెగా మేనల్లుడితో సీటీమార్ దర్శకుడి మైత్రీ..!

ఇటీవల 'రిపబ్లిక్' సినిమాతో ప్రేక్షకుల ముందుకు వచ్చిన మెగా మేనల్లుడు సాయి ధరమ్ తేజ్.. ఆశించిన స్థాయిలో సక్సెస్ అందుకోలేకపోయారు. ప్రస్తుతం తేజ్ చేతిలో 'భమ్ బోలేనాథ్' ఫేమ్ కార్తీక్ వర్మ దండు తెరకెక్కించనున్న మిస్టికల్ థ్రిల్లర్ ఉంది. అగ్ర దర్శకుడు సుకుమార్ ఈ సినిమా నిర్మాణంలో భాగస్వామిగా ఉండటమే కాకుండా.. స్టోరీ - స్క్రీన్ ప్లే అందిస్తున్నారు. దీని తర్వాత సంపత్ నంది దర్శకత్వంలో సుప్రీం హీరో ఓ మూవీ కమిట్ అయ్యారని వార్తలు వస్తున్నాయి.

'సీటీమార్' సినిమాతో సూపర్ హిట్ అందుకున్న డైరెక్టర్ సంపత్ నంది.. ఇప్పటికే మెగా పవర్ స్టార్ రామ్ చరణ్ తో 'రచ్చ' మూవీ తెరకెక్కించారు. ఈ క్రమంలో మెగా హీరో సాయి తేజ్ తో సినిమా చేయడానికి రెడీ అయ్యారని తెలుస్తోంది. ప్రస్తుతం టాలీవుడ్ స్టార్ హీరోలందరితో ప్రాజెక్ట్స్ సెట్ చేస్తున్న అగ్ర నిర్మాణ సంస్థ మైత్రీ మూవీ మేకర్స్.. ఇప్పుడు సాయి తేజ్ చిత్రాన్ని నిర్మించనుందని టాక్ నడుస్తోంది.

గతంలో మైత్రీ మూవీ మేకర్స్ బ్యానర్ లో సాయి ధరమ్ తేజ్ 'చిత్రలహరి' అనే మంచి ఎంటర్‌టైనర్‌ కోసం కలిసి పని చేసారు. తేజ్ సోదరుడు పంజా వైష్ణవ్ తేజ్ 'ఉప్పెన' చిత్రంతో మైత్రీ సంస్థ ద్వారానే హీరోగా లాంచ్ అయిన సంగతి తెలిసిందే. ఈ నేపథ్యంలో ఇప్పుడు సాయి తేజ్‌ తో మరోసారి మైత్రీ నిర్మాతలు చేతులు కలుపబోతున్నారని తెలుస్తోంది.

రోడ్డు ప్రమాదంలో తీవ్రంగా గాయపడిన సాయి తేజ్.. పూర్తిగా కోలుకుంటున్నాడు. వచ్చే ఏడాది తిరిగి సెట్స్ లో అడుగు పెట్టనున్నారు. కార్తీక్ దండు సినిమా షూటింగ్ పూర్తి చేసిన తర్వాత.. సంపత్ నంది ప్రాజెక్ట్ ని ప్రారంభించే అవకాశం ఉంది. సాయి తేజ్ కొత్త ప్రాజెక్ట్ గురించి మైత్రీ మూవీ మేకర్స్ త్వరలోనే అధికారిక ప్రకటన చేయబోతున్నారని సమాచారం.