ఎన్నికల వేడిని రాజేస్తున్న హీరో రానా

లీడర్.. రానా కెరీర్ లోనే తొలి చిత్రం.. తాత - తండ్రి సినీ నేపథ్యాన్ని బేస్ చేసుకొని రానా ఎంట్రీ ఇచ్చిన ఈ మూవీ బాక్సాఫీస్ వద్ద హిట్ కొట్టింది. ఈ సినిమాలో దర్శకుడు శేఖర్ కమ్ముల రాష్ట్ర రాజకీయాల్లోని లొసుగుల్ని ఎత్తి చూపి ప్రశంసలు అందుకున్నాడు. ఇక ఆ తర్వాత రానా విభిన్నమైన పాత్రలతో దూసుకుపోతున్నాడు. అటు హీరోగా.. ఇటు విలన్ గా కూడా చేస్తున్నాడు. బాహుబలితో దేశవ్యాప్తంగా క్రేజ్ ను సొంతం చేసుకున్నాడు. బాలీవుడ్ లో కూడా తనదైన ముద్ర వేస్తున్నాడు.

తాజాగా మరోసారి రాష్ట్ర రాజకీయాలను షేక్ చేసే కథతో రానా మనముందుకు వస్తున్నాడు. శేఖర్ కమ్ముల లీడర్ సీక్వెల్ తీసేందుకు రెడీ అయ్యారు. 2019 సార్వత్రిక ఎన్నికలకు ముందు ఈ సినిమాను రిలీజ్ చేసేందుకు ప్లాన్ చేసినట్టు సమాచారం. రాజకీయ నేపథ్యంలో వచ్చే ఈ లీడర్2 కథ పొలిటికల్ వాతావరణాన్ని వేడెక్కించేలా ఉంటుందని తెలిసింది.

శేఖర్ కమ్ముల ఇప్పటికే లీడర్2 కథను హీరో రానాకు వినిపించగా.. ఆయన కొన్ని చిన్న చిన్న మార్పులు సూచించినట్టు తెలిసింది. అవి సరిచేసి సెప్టెంబర్ నుంచి ఈ సినిమాను సెట్స్ పైకి తీసుకెళ్లేందుకు ప్లాన్ చేస్తున్నట్టు సమాచారం. లీడర్2తో రానా రాష్ట్ర రాజకీయాలను ఏమేరకు ప్రభావితం చేస్తాడన్నది వేచిచూడాలి.