క‌బాలి డేటును అత‌ను కొట్టేశాడు

జులై 15న దేశ‌విదేశాల్లో.. ముఖ్యంగా సౌత్ ఇండియాలో ప్ర‌కంప‌న‌లు రేగ‌డం ఖాయ‌మ‌నుకున్నారు. కానీ ఆ రోజు అదేమీ జ‌ర‌గ‌ద‌ని తేలిపోయింది. ‘క‌బాలి’ వాయిదా ప‌డ‌టం ఖాయ‌మ‌ని క్లారిటీ వ‌చ్చేసింది. అల్ల‌రి న‌రేష్ కొత్త సినిమా ‘సెల్ఫీ రాజా’ను జులై 15న విడుద‌ల చేయ‌డానికి నిర్ణ‌యించ‌డంతో ‘క‌బాలి’ వాయిదా సంగ‌తి క‌న్ఫ‌మ్ అయిపోయింది.

జులై 22న లేదంటే 29న ‘క‌బాలి’ విడుద‌ల‌య్యే అవ‌కాశ‌ముండ‌టంతో అప్ప‌ట్నుంచి వ‌రుస‌గా పెద్ద సినిమాల తాకిడి ఉంటుంద‌ని అల్ల‌రోడి కొత్త సినిమాను జులై 15కు ఫిక్స్ చేసేశారు. ‘సిద్ధు ఫ్ర‌మ్ శ్రీకాకుళం’ ఫేమ్ ఈశ్వ‌ర్ రెడ్డి దర్శ‌క‌త్వం వ‌హిస్తున్న ఈ చిత్రాన్ని రామ‌బ్ర‌హ్మం చౌద‌రి నిర్మిస్తున్నాడు.

చివ‌ర‌గా నాలుగేళ్ల కింద‌ట ‘సుడిగాడుతో హిట్ అందుకున్నాడు అల్ల‌రి న‌రేష్‌. ఆ త‌ర్వాత తొమ్మిది సినిమాల్లో న‌టించాడు కానీ.. ఒక్క‌టీ ఆడ‌లేదు. అందులోనూ ఈ మ‌ధ్య అత‌డి సినిమాల‌కు మినిమం ఓపెనింగ్స్ కూడా క‌ర‌వయ్యాయి. లాస్ట్ మూవీ ‘మామ మంచు అల్లుడు కంచు’ దారుణ‌మైన ఫ‌లితాన్ని చూసింది. ఈ నేప‌థ్యంలో ‘సెల్ఫీ రాజా’ మీద బోలెడు ఆశ‌ల‌తో ఉన్నాడు న‌రేష్‌. మ‌రి ఈ చిత్రం అల్ల‌రోడికి ఎలాంటి ఫ‌లితాన్నిస్తుందో చూడాలి.