అప్పట్లో ఆ హీరోయిన్ కు సొంతంగా హెలికాఫ్టర్.. 67 ఎకరాల తోట

ఇప్పుడంటే సొంతంగా హెలికాఫ్టర్.. బుల్లి విమానాన్ని మొయింటైన్ చేస్తున్న సెలబ్రిటీలు చాలామందే ఉన్నారు. కానీ.. ఇప్పుడు చెప్పేది దాదాపు యాభై ఏళ్ల క్రితం నాటి మాట. పాతతరం హీరోయిన్లలో టాప్ ప్లేస్ లో ఉన్న వారిలో కేఆర్ విజయ ఒకరు. హీరోయిన్ గా గ్లామర్ పాత్రల్ని పోషించటమే కాదు.. తర్వాతి కాలంలో దేవతల పాత్రలకు ఆమెకు సాటి వచ్చే వారే ఉండేవారు కాదు. ఇప్పటికి కొన్ని పాత్రలకు ఆమె లేని లోటు కొట్టొచ్చినట్లు కనిపిస్తూ ఉంటుంది.

ప్రస్తుతం కుమార్తెతో కలిసి చెన్నైలో ఉంటున్న కేఆర్ విజయ ఒక యూట్యూబ్ చానల్ తో మాట్లాడింది. అందులో ఆమె చెప్పిన విశేషాలు కొన్ని ఇప్పుడు ఆసక్తికరంగా మారాయి. అందులో ఒకటి.. ఆమెకు అప్పట్లోనే హెలికాఫ్టర్ ఉండటం. సినిమా షూటింగ్ లకు ఆమె తన సొంత హెలికాఫ్టర్ లో ప్రయాణించేవారు. ఆమె భర్త దాన్ని నడిపేవారని చెప్పుకొచ్చారు.

పెళ్లి తర్వాత కూడా మహరాణిలా జీవితాన్ని లీడ్ చేసిన ఆమెకు చెన్నై సమీపంలో 67 ఎకరాల తోట ఉన్నట్లుగా చెప్పుకొచ్చారు. కేరళ.. హైదరాబాద్.. తమిళనాడులో ఎక్కడ షూటింగ్ లు ఉన్నా తన సొంత హెలికాఫ్టర్ లో ఆమె రావటం చూసి అప్పటి స్టార్ హీరోలు సైతం నోరెళ్లబెట్టేవారట.

తన భర్తకు పలు రకాల బిజినెస్ లు ఉండేవని.. రాజభవనం లాంటి విలాసవంతమైన ఇంటిని నిర్మించుకున్నట్లు చెప్పారు. తన ఇంట్లోని విలాసవంతమైన వసతుల్ని చూసి అప్పటి స్టార్ హీరోలు సైతం ఆశ్చర్యపోయేవారని ఆమె చెప్పుకోవటం గమనార్హం. నిజానికి ఆమెకు సంబంధించిన విశేషాలు ఇండస్ట్రీలో హాట్ టాపిక్ గా ఉండేవి. ఆమె వైభోగం తరచూ చర్చకు వస్తూ ఉండేది. భర్త మరణానంతరం బిజినెస్ లను ఆమె కొంతకాలం చూశారు. తర్వాత ఆమె కుమార్తెకు వాటిని అప్పజెప్పారు..