జాతీయ అవార్డ్ ఓటీటీ సినిమా థియేట‌ర్ల‌కు..

హిట్ట‌యిన సినిమాని లేదా విమ‌ర్శ‌కుల ప్ర‌శంస‌లు స‌హా అవార్డులు గెలుచుకున్న సినిమాల‌పై జ‌నాల్లో క్యూరియాసిటీ ఎప్పుడూ ఉంటుంది. అగ్ర హీరోల క‌మ‌ర్షియ‌ల్ సినిమాల‌తో పాటు వీటిపైనా కొంత క్యూరియాసిటీ షురూ!

ఇటీవలి కాలంలో ప‌వ‌న్ క‌ల్యాణ్ - జ‌ల్సా.. ఎన్టీఆర్ ఆది- మహేష్ పోకిరి- బాలయ్య చెన్నకేశవ రెడ్డి- ప్రభాస్ బిల్లా చిత్రాలను థియేటర్లలో విడుదల చేయగా అభిమానులు మ‌ళ్లీ ఆద‌రించారు. ఈ ట్రెండ్ తదుపరి స్థాయికి చేరుకుంటోంది. ఇప్పుడు ఓటీటీ సినిమా తిరిగి థియేట‌ర్ల‌లోకి వ‌స్తుండ‌డ‌మే ఆశ్చ‌ర్యక‌రం.

2020 కోవిడ్ మహమ్మారి లాక్ డౌన్ ను నిర్ధారిస్తున్న సమయంలో అన్ని వర్గాల ప్రేక్షకులను ఆకట్టుకున్న చిత్రం `కలర్ ఫోటో` ఇప్పుడు థియేట‌ర్ల‌లోకి వ‌స్తుండ‌డం కొత్త ట్రెండ్ అని చెప్పాలి. యూట్యూబర్ సుహాస్ -షార్ట్ ఫిల్మ్ ఫేమ్ చాందిని చౌదరి ప్రధాన పాత్రలలో చాయ్ బిస్కెట్ ఫేమ్ సందీప్ దర్శకత్వం వహించిన ఈ చిత్రం ప్రశంసలు అందుకుంది. అలాగే 68వ జాతీయ చలనచిత్ర అవార్డులలో ఉత్తమ ప్రాంతీయ తెలుగు సినిమా అవార్డును కూడా గెలుచుకుంది. ఇప్పుడు ఈ సినిమా విడుదలై 2వ వార్షికోత్సవాన్ని పురస్కరించుకుని ఈ చిత్రాన్ని థియేటర్లలో విడుదల చేయనున్నారు.

19 నవంబర్ 2022న `కలర్ ఫోటో` మొదటిసారిగా బాక్సాఫీస్ బ‌రిలోకి దిగుతోంది. ఆశ్చర్యకరంగా ఈ చిత్రంతో నాయ‌కానాయిక‌ల‌కు మంచి గుర్తింపు ఇప్ప‌టికే ద‌క్కింది. థియేట్రిక‌ల్ రిలీజ్ తో మ‌రింత గుర్తింపు ద‌క్కుతుంద‌న‌డంలో సందేహం లేదు. ప్ర‌తిభావంతులైన‌ సుహాస్- చాందిని వ‌రుస‌గా అవ‌కాశాలు అందుకుంటున్నారు. సుహాస్ సినిమాలేవీ ఇంకా రాక‌పోయినా కానీ.. సమ్మతమే చిత్రంతో చాందిని అభిమానుల ముందుకు వ‌చ్చింది. ఇది పెద్ద‌గా ఆడ‌లేదు. అయినా ఇప్పుడు సంచలనాత్మక OTT చిత్రం ఇప్పుడు మ‌రోసారి థియేట‌ర్ల‌లో అంద‌రినీ అల‌రించ‌నుంది. మిస్స‌య్యాం అనుకున్న‌వాళ్లు మ‌ళ్లీ చూడాల్సిన సినిమాగా క‌ల‌ర్ ఫోటో గురించి టాక్ ఉంది.