బాలీవుడ్ లో భారీ మల్టీస్టారర్ రానుందా..?

దర్శక ధీరుడు రాజమౌళికి దేశవ్యాప్తంగా మాములు క్రేజ్ లేదు. పాన్ ఇండియా లెవెల్ లో స్టార్ హీరోలకు ఉండే క్రేజ్ ని ఆయన సినిమాలతో దక్కించుకున్నారు. బాహుబలి సినిమాతో రాజమౌళి దేశం మొత్తానికి పరిచయమయ్యాడు. ప్రస్తుతం ఆయన ఎంతో ప్రతిష్టాత్మకంగా "రౌద్రం రుధిరం రణం" ఆర్ఆర్ఆర్ సినిమాను తెరకెక్కిస్తున్నాడు. టాలీవుడ్ స్టార్ హీరోలు ఎన్టీఆర్, రాంచరణ్ లు ప్రధాన పాత్రలు పోషిస్తుండగా పాన్ ఇండియా స్థాయిలో ఈ సినిమాను రూపొందిస్తున్నారు. ఇక ఈ మధ్య బాలీవుడ్ బడా హీరోల బాక్సాఫీస్ లెక్కలు తారుమరవ్వడంతో అంతకుమించిన మల్టీస్టారర్ సినిమా చేయాలని ప్లాన్ చేసినట్లు అనిపిస్తోంది.

ఆర్ఆర్ఆర్ లో రామ్ చరణ్ - జూనియర్ ఎన్టీఆర్ లాంటి టాలెంటెడ్ స్టార్ హీరోలు నటిస్తుండడం మెయిన్ అట్రాక్షన్. బాలీవుడ్ లో కూడా ఈ సినిమా భారీగా రిలీజ్ చేయాలని చిత్ర యూనిట్ ప్లాన్ చేస్తోంది. అయితే ఆ సినిమాకు మించిన మల్టీస్టారర్ ప్రాజెక్ట్ ని పట్టాలెక్కించేందుకు షారుక్, సల్మాన్ ఖాన్ తో చేతులు కలపబోతున్నాడట. బాలీవుడ్ ప్రముఖ నిర్మాత నిఖిల్ ద్వివేది వీరితో మల్టీస్టారర్ సినిమాను భారీ స్థాయిలో నిర్మించేందుకు బ్యాక్ గ్రౌండ్ వర్క్ ని కూడా మొదలుపెట్టినట్లు సమాచారం. ముందుగా ఈ బాలీవుడ్ మల్టీస్టారర్ ప్లాన్ కి షారుక్ ఖాన్ బీజం వేసినట్లు టాక్ వస్తోంది. ఎందుకంటే గత కొంతకాలంగా ఇద్దరు హీరోల ఖాతాలో సరైన విజయాలు లేవు. దీంతో ఇద్దరి క్రేజ్ కి మల్టీస్టారర్ మసాలాను యాడ్ చేసి హిట్టుకొట్టాలని ప్లాన్ చేసుకుంటున్నారట. మల్టీస్టారర్ పై ఇద్దరు స్టార్లు సానుకూలంగా ఆలోచించినట్లు సోషల్ మీడియా టాక్. చూడాలి మరి ఫ్యాన్స్ కి త్వరలో ఏదైనా తీపి కబురు వినిపిస్తుందేమో..