స‌ల్మాన్ డ్యాన్సులు షారుఖ్ వేశాడు

బాలీవుడ్ హీరోలు క్రాస్ ప్ర‌మోష‌న్స్‌ తో ఆక‌ట్టుకుంటున్నారు. ముఖ్యంగా ఖాన్ ద్వ‌యం స‌ల్మాన్‌ - షారుఖ్‌ లు ఒక‌రి సినిమాని మ‌రొక‌రు ప్ర‌మోట్ చేసుకుంటుండ‌డం ప్రేక్ష‌కుల్ని మ‌రింత‌గా ఆక‌ర్షిస్తోంది. మామూలుగా ఎవ‌రి సినిమాల్ని వాళ్లే ప్ర‌మోట్ చేసుకుంటుంటారు. అలాగ‌యితే అందులో కొత్తేముంటుంది అనుకున్నారేమో బాలీవుడ్ హీరోలు! అందుకే ఒక‌రి సినిమాకి మ‌రొక‌రు ప్ర‌మోష‌న్ చేయ‌డం అల‌వాటు చేసుకొన్నారు. దీన్నే క్రాస్ ప్ర‌మోష‌న్ అంటారు. ఆ విష‌యంలో స‌ల్మాన్‌ ఖాన్‌ - షారుఖ్‌ ఖాన్‌ లు ముందుంటున్నారు.

ఆమ‌ధ్య స‌ల్మాన్‌ ఖాన్ న‌టించిన భ‌జ‌రంగీ భాయ్‌జాన్ సినిమాకి సంబంధించిన ఫ‌స్ట్‌ లుక్ పోస్ట‌ర్‌ ని షారుఖ్‌ ఖాన్ త‌న ట్విట్ట‌ర్ ద్వారా విడుదల చేశాడు. ఆ త‌ర్వాత షారుఖ్ `రాయిస్‌`ని స‌ల్మాన్‌ ఖాన్ త‌న ట్విట్ట‌ర్ ద్వారా ప్ర‌మోట్ చేశాడు. ఒక‌ప్పుడు శ‌త్రువులుగా మ‌స‌లుకొన్న ఆ ఇద్ద‌రూ ఇలా భాయీ భాయీ అని చేతులు క‌ల‌ప‌డం, మ‌ళ్లీ ఒకరికొక‌రు ద‌గ్గ‌ర‌వ‌డం, ప్రేమాభిమానాల‌తో ఒకరి సినిమాని మ‌రొక‌రు ప్ర‌మోట్ చేసుకోవ‌డం బాలీవుడ్ ప్రేక్ష‌కుల‌కు, సినీ జ‌నాల‌కు భ‌లే న‌చ్చింది.

తాజాగా మ‌రోసారి స‌ల్మాన్‌ ఖాన్ క‌థానాయ‌కుడిగా న‌టించిన `ప్రేమ్ ర‌త‌న్ ధ‌న్ పాయో` చిత్రాన్ని షారుఖ్‌ ఖాన్ త‌న‌దైన స్టైల్‌ లో ప్ర‌మోట్ చేశాడు. ప్రేమ్ ర‌త‌న్ ధ‌న్ పాయో... అంటూ సాగే పాట‌కి త‌న దిల్‌ వాలే టీమ్ మెంబ‌ర్స్‌ తో క‌లిసి డ్యాన్సులు వేస్తూ డ‌బ్ స్మాష్ చేశాడు షారుఖ్‌. ఆ వీడియోని దిల్‌వాలే టీమ్ మొత్తం ఆన్‌ లైన్ ద్వారా ప్ర‌మోట్ చేసింది. అది చూసిన స‌ల్మాన్‌ ఖాన్ క‌దిలిపోయాడు. తుజే దేఖా తోయే జానా స‌న‌మ్‌... అంటూ షారుఖ్ పాట‌కి త‌న ప్రేమ్ ర‌త‌న్ ధ‌న్ పాయో టీమ్‌ తో క‌లిసి ఓ వీడియో చేసి ఆన్‌ లైన్‌ లో విడుద‌ల చేశాడు. ఇలా ఖాన్ బ్ర‌ద‌ర్స్ ఒకరికొక‌రు ప్రేమాభిమానాల్ని ప్ర‌ద‌ర్శించుకుంటుండ‌డం మాత్రం మ‌ల్టీస్టార‌ర్ సినిమా చూసిన అనుభూతి క‌లుగుతోంది. ఆన్‌ లైన్‌ లో ఖాన్ బ్ర‌ద‌ర్స్ సంద‌డి చూస్తున్న టాలీవుడ్ జ‌నాలు ఇలా మ‌న‌వాళ్లు కూడా ఒక‌రి సినిమాని మ‌రొక‌రు ప్ర‌మోట్ చేస్తే ఎంత బాగుంటుందో క‌దా అని మాట్లాడుకుంటున్నారు.