టుస్సాడ్‌ లో షారుఖ్ ను ఏం చేశారో తెలుసా?

లండన్‌ లోని మేడమ్ టుస్సాడ్ మ్యూజియంలో చోటు దక్కించుకున్న భారతీయ సెలబ్రెటీల్లో షారుఖ్ ఖాన్ ఒకడు. ఐతే బాలీవుడ్ బాద్ షాకు ఇండియాలో ఎలా స్పెషల్ ట్రీట్ మెంట్ ఉంటుందో.. టుస్సాడ్ మ్యూజియంలో కూడా అలాంటి ప్రయారిటీనే ఇస్తున్నారు. షారుఖ్ కొత్త సినిమాలు విడుదలైనపుడు.. వాటికి తగ్గట్లుగా మ్యూజియంలోని విగ్రహానికి మేకప్ కూడా చేస్తున్నారు. ఈ శుక్రవారం కింగ్ ఖాన్ కొత్త సినిమా ‘ఫ్యాన్’ రిలీజవుతున్న నేపథ్యంలో టుస్సాడ్ లోని షారుఖ్ విగ్రహానికి కొత్త మేకప్ వేశారు. ‘ఫ్యాన్’ సినిమాలో అభిమానిగా నటిస్తున్న గౌరవ్ లాగా ఈ విగ్రహాన్ని తీర్చిదిద్దారు.

కేవలం డ్రెస్ మార్చి వదిలేయకుండా.. ముఖ కవళికల్ని మార్చారు. క్రాఫ్ కూడా ఛేంజ్ చేశారు. మొత్తంగా షారుఖ్ అవతారమే మారిపోయిందక్కడ. బహుశా షారుఖ్ కొత్త సినిమా రిలీజయ్యే వరకు విగ్రహం ఈ అవతారంలోనే ఉంటుందేమో. టుస్సాడ్ మ్యూజియంలో విగ్రహం ఏర్పాటవడమే విశేషం అనుకుంటే.. ఇలా అకేషన్ కు తగ్గట్లుగా స్టాచ్యూ ఆకృతిని కూడా మార్చడమంటే మామూలు విషయం కాదు. షారుఖ్ పాపులారిటీకి ఇది నిదర్శనం అనుకోవాలి. మనీష్ శర్మ దర్శకత్వంలో యశ్ రాజ్ ఫిలిమ్స్ నిర్మించిన ‘ఫ్యాన్’లో షారుఖ్ ద్విపాత్రాభినయం చేశాడు. ఆర్యన్ ఖన్నా అనే సూపర్ స్టార్ గా.. గౌరవ్ అనే అతడి వీరాభిమానిగా.. రెండు పాత్రల్లో అలరించబోతున్నాడు కింగ్ ఖాన్.