అభిమాన హీరోను చూసి ఏడ్చేశాడు

చుక్క‌ల్లో విహ‌రించే తార‌ల్లాంటి న‌టులు క‌ళ్ల ముందుకు దిగి వ‌స్తే ఆ ఆనంద‌మే వేరుగా ఉంటుంది. ఎప్పుడెప్పుడు క‌లుద్దామ‌ని ఆత్రుత‌గా ఎదురు చూసే అభిమాన న‌టుడు క‌ళ్ల ముందు క‌నిపించ‌టంతో ఆ అభిమాని భావోద్వేగాన్ని ఆపుకోలేక‌పోయారు. భోరున ఏడ్చేశాడు. ఈ ఉదంతంలో మ‌రో ట్విస్ట్ ఏమిటంటే.. త‌న‌ను చూసి తీవ్ర భావోద్వేగానికి గురైన అభిమానిని స‌ద‌రు హీరో గుర్తించి ద‌గ్గ‌ర‌కు పిలిచారు. ఇంత‌కీ ఆ అగ్ర హీరో ఎవ‌రు? ఆ అభిమాని ఎవ‌రు? ఈ భావోద్వేగ స‌న్నివేశానికి వేదిక‌గా నిలిచిన ప్లేస్ ఏమిట‌న్న‌ది చూస్తే..

కింగ్ ఖాన్ షారుక్ కు అభిమానులు ఎంత‌లా ఉంటార‌న్న‌ది ప్ర‌త్యేకించి చెప్పాల్సిన అవ‌స‌ర‌మే ఉండ‌దు. తాజాగా ఆయ‌న న‌టిస్తున్న చిత్రం జ‌బ్ హ్యారీ మెట్ సెజ‌ల్‌. ఈ చిత్ర ప్ర‌చార కార్య‌క్ర‌మం ముంబ‌యిలో జ‌రిగింది. ఈ సంద‌ర్భంగా షారుక్ బ‌య‌ట‌కు వ‌చ్చారు.

షారుక్‌ను చూసిన ఒక అభిమాని తీవ్ర ఉద్వేగానికి గుర‌య్యాడు. సెల్ఫీ కావాలంటూ షారుక్‌ను కోరుతూ.. నిల‌బ‌డ్డాడు. అంత హ‌డావుడిలోనూ ఈ అభిమానిని గుర్తించాడు షారుక్‌. స‌ద‌రు అభిమానిని ద‌గ్గ‌ర‌కు పిలిచిన షారుక్ అత‌నితో సెల్ఫీ దిగాడు. తానెంతో అభిమానించే హీరో త‌న క‌ళ్ల ముందుకు రావ‌ట‌మే కాదు.. స్వ‌యంగా ద‌గ్గ‌ర‌కు పిలిచి సెల్ఫీకి అనుమ‌తి ఇవ్వ‌టంతో తీవ్ర భావోద్వేగానికి గుర‌య్యాడు. అప్ప‌టికే ఏడుస్తున్న అభిమాని.. మ‌రింతగా ఏడ్చేశాడు. షారుక్ తో ఈ అభిమాని ఏడుస్తూ దిగిన సెల్ఫీ ఇప్పుడు వైర‌ల్ గా మారింది. సోష‌ల్ మీడియాలో ఇప్పుడీ ఫోటో గురించి ఆస‌క్తిగా చ‌ర్చించుకుంటున్నారు.