బాలీవుడ్ బాద్షాతో విజిల్ డైరెక్టర్ సినిమా..!!

తమిళ యువదర్శకుడు అట్లీ కుమార్.. గురించి సౌత్ ప్రేక్షకులకు పెద్దగా పరిచయం చేయాల్సిన అవసరం లేదు. ఎందుకంటే అట్లీ తెరకెక్కించిన సినిమాలే అతని పేరును గుర్తుంచుకునేలా చేసాయి. రాజారాణి సినిమాతో దర్శకుడుగా మారిన అట్లీ.. ఆ తర్వాత పోలీసోడు, మెర్సల్, విజిల్ సినిమాలు తెరకెక్కించి థియేటర్స్ లో విజిల్స్ వేయించాడు. విజిల్ 2019లో విడుదలైంది. అప్పటినుండి అట్లీ తదుపరి సినిమా ఏదనే చర్చలు నడుస్తున్నాయి. అట్లీ నుండి సినిమా వచ్చి దాదాపు రెండేళ్లు కావస్తుంది. అయితే తాజాగా స్టార్ హీరోతో సినిమా సెట్ అయినట్లు తెలుస్తుంది. ఈ గ్యాప్ లో మంచి స్క్రిప్ట్ రెడీ చేసుకున్నాడని తమిళ ఇండస్ట్రీలో టాక్ నడుస్తుంది. బాలీవుడ్ సూపర్ స్టార్ షారుఖ్ ఖాన్ తన కెరీర్లో ఫస్ట్ టైం ఎక్కువ విరామం తీసుకున్నాడు.

ప్రస్తుతం షారుఖ్.. సిద్ధార్థ్ ఆనంద్ దర్శకత్వంలో పఠాన్ సినిమా చేస్తున్నాడు. ఈ చిత్రం వచ్చే ఏడాది విడుదల కాబోతుంది. అయితే షారుఖ్ తన రాబోయే సినిమాలకోసం టాప్ డైరెక్టర్ రాజ్‌కుమార్ హిరానీతో పాటు అట్లీతో కూడా చర్చలు జరుపుతున్నాడు. అయితే ఇంకా అధికారిక న్యూస్ రాలేదుగాని షారుఖ్ అట్లీతో సినిమా చేసేందుకు ఆమోదం తెలిపినట్లు బాలీవుడ్ వర్గాల సమాచారం. ఈ సినిమా ఆగష్టు నుండి ప్రారంభమవుతుందట. యాక్షన్ ఎంటర్టైనర్ గా రూపొందనున్న అట్లీ సినిమాలో షారుఖ్.. డ్యూయెల్ రోల్ చేయనున్నట్లు టాక్. అట్లీ ప్రస్తుతం ప్రీ-ప్రొడక్షన్ పనుల్లో బిజీగా ఉన్నాడట. అయితే షారుఖ్ ఈ సినిమాలో ఒక పాత్రలో దర్యాప్తు అధికారిగా.. మరోపాత్రలో మోస్ట్ వాంటెడ్ క్రిమినల్ గా కనిపిస్తాడని ఇండస్ట్రీ వర్గాలలో వార్తలు వైరల్ అవుతున్నాయి. ప్రస్తుతం షారుఖ్.. హిరాని సినిమాను వాయిదా వేసే ఆలోచనలో ఉన్నాడట. షారుఖ్ తో సినిమా గురించి అట్లీ రెండేళ్లుగా వెయిట్ చేస్తున్నాడు. చూడాలి మరి అధికారిక ప్రకటన త్వరలో రానుందేమో!