మరుగుజ్జు పాత్రలో షారుఖ్

ఓవైపు అమీర్ ఖాన్ చాలా ఏళ్లుగా వైవిధ్యమైన సినిమాలు చేస్తూ ఇంతింతై అన్నట్లు ఎదిగిపోతున్నాడు. సల్మాన్ ఖాన్ కు కూడా కొంచెం లేటుగా జ్నానోదం అయి.. ఈ మధ్య వైవిధ్యమైన పాత్రలు ఎంచుకుంటున్నాడు. ఐతే షారుఖ్ ఖాన్ మాత్రమే రొటీన్ మసలా సినిమాలు చేసుకుంటూ గడిపేశాడు. దీంతో అతడి ఇమేజ్.. ఫాలోయింగ్ రోజు రోజుకూ దెబ్బ తింటూ వస్తోంది. ఈ ఏడాది ఎట్టకేలకు ‘ఫ్యాన్’ అనే వెరైటీ సినిమా ఒకటి చేశాడు కానీ.. అది సరైన ఫలితాన్నివ్వలేదు. రిజల్ట్ ఎలా ఉన్నా ఈ రోజుల్లో భిన్నమైన పాత్రలు.. భిన్నమైన సినిమాలు ఎంచుకోకుండా మనుగడ కష్టం. అందుకే షారుఖ్ మరో వెరైటీ పాత్రతో పలకరించబోతున్నాడు.

షారుఖ్ తన తర్వాతి సినిమాలో మరుగుజ్జుగా కనిపించబోతుండటం విశేషం. తను వెడ్స్ మను.. తను వెడ్స్ మను రిటర్న్స్.. రాంజానా లాంటి సినిమాలు తీసిన ఆనంద్.ఎల్.రాయ్ దర్శకత్వంలో తెరకెక్కబోయే కొత్త సినిమాలో షారుఖ్ మరుగుజ్జుగా కనిపిస్తాడట. ఇదొక గొప్ప కథ అని.. షారుఖ్ ఖాన్ ను సరికొత్త అవతారంలో చూస్తారని అంటున్నాడు ఆనంద్.ఎల్.రాయ్. ఈ చిత్రంలో షారుఖ్ సరసన పరిణీతి చోప్రా కథానాయికగా నటించే అవకాశాలున్నాయి. ఈ సినిమా వచ్చే ఏడాది సెట్స్ మీదికి వెళ్తుంది. 2018 క్రిస్మస్ కానుకగా రిలీజవుతుందట. ఈ చిత్రాన్ని తన సొంత నిర్మాణ సంస్థ రెడ్ చిల్లీస్ ఎంటర్టైన్మెంట్ లోనే నిర్మించబోతున్నాడు షారుఖ్. ఈ లోపు ‘రాయీస్’.. ‘ది రింగ్’ లాంటి సినిమాలతో పలకరిస్తాడు కింగ్ ఖాన్.