అర్జున్‌ రెడ్డిని 'కబీర్‌ సింగ్‌' గా మార్చారు

గత సంవత్సరం తెలుగు ప్రేక్షకుల ముందుకు వచ్చి సంచలన విజయాన్ని సొంతం చేసుకున్న యూత్‌ ఫుల్‌ ఎంటర్‌ టైనర్‌ ‘అర్జున్‌ రెడ్డి’ ప్రస్తుతం తమిళం - హిందీల్లో రీమేక్‌ అవుతున్న విషయం తెల్సిందే. ఇప్పటికే తమిళంలో దృవ్‌ హీరోగా ‘వర్మ’ అనే టైటిల్‌ తో రీమేక్‌ ప్రారంభం అవ్వడం - ఫస్ట్‌ లుక్‌ మరియు టీజర్‌ లు కూడా వచ్చేయడం జరిగింది. త్వరలోనే తమిళ ‘అర్జున్‌ రెడ్డి’ ‘వర్మ’గా ప్రేక్షకుల ముందుకు రాబోతున్నాడు. ఈ సమయంలోనే హిందీలో కూడా ‘అర్జున్‌ రెడ్డి’ రీమేక్‌ ప్రారంభం అయ్యింది. తాజాగా ఈ చిత్రం షూటింగ్‌ ను ప్రారంభించారు.

బాలీవుడ్‌ లో అర్జున్‌ రెడ్డి రీమేక్‌ లో విజయ్‌ దేవరకొండ పాత్రను షాహిద్‌ కపూర్‌ పోషిస్తున్న విషయం తెల్సిందే. మూడు నాలుగు నెలల క్రితమే ఈ విషయమై అపిషియల్‌ గా అనౌన్స్‌ చేశారు. తెలుగు వర్షన్‌ కు దర్శకత్వం వహించిన సందీప్‌ వంగ హిందీ రీమేక్‌ కు దర్శకత్వం వహిస్తున్నాడు. ఇప్పటికే ఈ చిత్రం కోసం ప్రీ ప్రొడక్షన్‌ వర్క్‌ ను పూర్తి చేసిన దర్శకుడు తాజాగా ముంబయిలో చిత్రీకరణ ప్రారంభించాడు. ఈ రీమేక్‌ కు ‘కబీర్‌ సింగ్‌’ అనే టైటిల్‌ ను ఖరారు చేసినట్లుగా బాలీవుడ్‌ వర్గాల నుండి సమాచారం అందుతుంది.

అర్జున్‌ రెడ్డి టైటిల్‌ సౌత్‌ ఆడియన్స్‌ కు అయితే సెట్‌ అవుతుంది కాని నార్త్‌ వారికి సెట్‌ అవ్వదు. అందుకే పంజాబ్‌ నేపథ్యంలో ఈ చిత్రం తెరకెక్కిస్తూ కబీర్‌ సింగ్‌ అంటూ టైటిల్‌ ను ఫిక్స్‌ చేసినట్లుగా తెలుస్తోంది. ఈ చిత్రం కోసం రెండు మూడు నెలలుగా షాహిద్‌ కపూర్‌ జుట్టు మరియు గడ్డం పెంచుతున్నాడు. ప్రస్తుతం జుట్టు మరియు గడ్డంతో సీన్స్‌ ను చిత్రీకరిస్తున్నారు. త్వరలోనే దిల్లీలో చిత్రీకరణ జరపబోతున్నారు. ఆ తర్వాత షాహిద్‌ జట్టు - గడ్డం ట్రిమ్‌ చేసి చిత్రీకరణలో పాల్గొంటాడట.

ఈ చిత్రంలో కియారా అద్వానీ హీరోయిన్‌ గా నటిస్తోంది. ప్రస్తుతం ఈమె సౌత్‌ లో మరియు నార్త్‌ లో క్రేజీ బ్యూటీగా దూసుకు పోతుంది. అందుకే ఈమె ఎంపిక సినిమాకు ప్లస్‌ అవుతుందని ప్రేక్షకులు భావిస్తున్నారు. తెలుగు అర్జున్‌ రెడ్డికి మించి బాలీవుడ్‌ ‘కబీర్‌ సింగ్‌’ లో ముద్దు సీన్స్‌ ఉంటాయని సమాచారం అందుతుంది. అర్జున్‌ రెడ్డి మ్యాజిక్‌ అక్కడ రిపీట్‌ అవుతుందా అనేది చూడాలి.