అర్జున్ రెడ్డి లా మారిన షాహిద్

విజయ్ దేవరకొండ - సందీప్ వంగా కాంబినేషన్ లో తెరకెక్కిన 'అర్జున్ రెడ్డి' సంచలన విజయం సాధించడంతో ఆ సినిమాను ఇప్పుడు ఇతర భాషల్లోకి రీమేక్ చేస్తున్నారు. ఒరిజినల్ చిత్ర దర్శకుడు సందీపే హిందీలో కూడా దర్శకత్వం వహిస్తుండగా షాహిద్ కపూర్ - కియారా అద్వానిలు హీరో హీరోయిన్ లుగా నటిస్తున్నారు. ఇప్పటికే ఈ సినిమా టైటిల్ కబీర్ సింగ్ అని ప్రకటించారు. తాజాగా ఈ సినిమా షూటింగ్ లొకేషన్ నుండి షాహిద్ కపూర్ స్టిల్ ఒకటి లీక్ అయింది.

చిందరవందర జుట్టు.. గుబురు గడ్డంతో షాహిద్ కపూర్ షర్టు లేకుండా నిలబడి ఉన్నాడు. బ్లాక్ టీ- షర్ట్ ను మాత్రం విజయ్ స్టైల్ లోనే భుజంమీద వేసుకున్నాడు. మేకప్ మ్యాన్ అద్దం చూపిస్తుంటే తన జుట్టును సరిచేసుకుంటున్నాడు. ఈ లీక్ ఫోటో సోషల్ మీడియాలో ఇప్పటికే వైరల్ అయింది. ఎలాగూ ఈ సినిమాను డైరెక్ట్ చేసేది సందీప్ కాబట్టి ఆషామాషీగా చేస్తాడని అనుకోలేం. ఒరిజినల్ ఫ్లేవర్ చెడకుండా హిందీ ఆడియన్స్ టేస్ట్ కి తగ్గట్టు తీయగలడని మాత్రం చాలామందికి నమ్మకం ఉంది.

షాహిద్ కూడా ఒక బ్రిలియంట్ ఆర్టిస్ట్. 'ఉడ్తా పంజాబ్' సినిమాలో డ్రగ్ అడిక్ట్ అయిన సింగర్ గా తన నటనతో విమర్శకుల మెప్పు పొందాడు. అందుకే మిగతా బాషల రీమేక్ కంటే కూడా దీనీపై అందరిలోనూ ఆసక్తి వ్యక్తం అవుతోంది.