ఫోటో స్టొరీ: రౌడీని మ్యాచ్ చేసేలా ఉన్నాడే

తెలుగు లో సంచలనం సృష్టించిన 'అర్జున్ రెడ్డి' ని హిందీలో 'కబీర్ సింగ్' పేరుతో రీమేక్ చేస్తున్న సంగతి తెలిసిందే. విజయ్ దేవరకొండ పాత్రను హిందీలో షాహిద్ కపూర్ పోషిస్తున్నాడు. తెలుగు వెర్షన్ కు దర్శకత్వం వహించిన సందీప్ వంగా 'కబీర్ సింగ్' ను కూడా తెరకెక్కిస్తున్నాడు.

'అర్జున్ రెడ్డి' లో విజయ్ దేవరకొండ రెండు డిఫరెంట్ గెటప్స్ లో కనిపించిన సంగతి తెలిసిందే. మెడికల్ స్టూడెంట్ గా స్టైలిష్ లుక్ లోనూ లవ్ ఫెయిల్యూర్ అయిన సమయంలో జుట్టుతో పాటు గడ్డం మీసాలు పెంచి ఒక రఫ్ లుక్ లో నూ కన్పించాడు. ఇప్పటికే రీమేక్ లో షాహిద్ గడ్డం లుక్ బయటకు వచ్చింది. తాజాగా షాహిద్ తన సోషల్ మీడియా ఖాతా ద్వారా షేర్ చేసిన ఫోటోలో కాలేజి స్టూడెంట్ లుక్ లో ఉన్నాడు. గడ్డం తీసేశాడు.. షార్ట్ హెయిర్ తో ఉన్నాడు. బ్లాక్ అండ్ వైట్ ఫోటోలో రాయల్ ఎన్ఫీల్డ్ బైకుపై స్టైల్ గా కూర్చున్నాడు. జీన్స్ ప్యాంట్.. టీ-షర్ట్.. పైనేమో జాకెట్.. కళ్ళకు కూలింగ్ గ్లాసెస్ తో ఫుల్ గా రౌడీ యాటిట్యూడ్ కనిపిస్తోంది.

తమిళ రీమేక్ లో విక్రమ్ తనయుడు ధృవ్ కు పాజిటివ్ ఫీడ్ బ్యాక్ రాలేదుగానీ హిందీ రీమేక్ లో షాహిద్ కు మాత్రం ఆడియన్స్ నుండి పాజిటివ్ రెస్పాన్స్ వస్తోంది. పైగా ఒరిజినల్ సినిమా దర్శకుడే రీమేక్ కు డైరెక్టర్ కావడంతో హిందీ వెర్షన్ పై అంచనాలు భారీగానే ఉన్నాయి.