కింగ్ ఖాన్ ని లైన్ లో పెట్టిన సౌత్ డైరెక్ట‌ర్

ఉత్త‌రాది ద‌క్షిణాది మ‌ధ్య అంత‌రాలు చెరిగిపోతున్న సంగ‌తి తెలిసిందే. ద‌క్షిణాది ద‌ర్శ‌కుల స‌త్తా ఏంటో బాలీవుడ్ కి తెలిసొస్తోంది. ఇటీవ‌లే సందీప్ రెడ్డి వంగా క‌బీర్ సింగ్ తో స‌త్తా చాటాడు. ప‌లువురు ద‌ర్శ‌కులు ఉత్తరాదిన నిరూపించుకునేందుకు ప్ర‌య‌త్నిస్తున్నారు. ఈ కోవ‌లోనే ట్యాలెంటెడ్ డైరెక్ట‌ర్ అట్లీ కుమార్ ఓ క్రేజీ ప్రాజెక్టుతో సెన్సేష‌న్స్ కి రెడీ అవుతున్నాడ‌ట‌.

గ‌త కొంత‌కాలంగా బాలీవుడ్ లో అట్లీ సినిమా ప్ర‌య‌త్నాల‌పై ఆస‌క్తిక‌ర చ‌ర్చ సాగుతోంది. ద‌ళ‌ప‌తి విజ‌య్ హీరోగా అత‌డు తేరి-మెర్స‌ల్ (అదిరింది)-బిగిల్ (విజిల్) వంటి చిత్రాల‌తో స‌త్తా చాటాడు. మాస్ ప‌ల్స్ తెలిసిన ద‌ర్శ‌కుడిగా గుర్తింపు తెచ్చుకున్నాడు. ఆ క్ర‌మంలోనే బిగిల్ చిత్రీక‌ర‌ణ‌ స‌మ‌యంలోనే షారూక్ తో అత‌డు మంత‌నాలు సాగించిన సంగ‌తి తెలిసిందే. అందుకు సంబంధించిన కొన్ని ఫోటోలు ఇంత‌కుముందు రివీల‌య్యాయి.

తాజా స‌మాచారం ప్ర‌కారం ఈ ప్రాజెక్ట్ ఖాయ‌మైంద‌ని తెలుస్తోంది. బాలీవుడ్ కింగ్ ఖాన్ షారుఖ్ ఖాన్ ద‌క్షిణాది యువ‌ ద‌ర్శ‌కుడు అట్లీ ద‌ర్శ‌క‌త్వంలో న‌టించ‌డానికి సిద్ధ‌మ‌వుతున్నారని వెల్ల‌డైంది. త్వ‌ర‌లో వీరిద్ద‌రి క‌ల‌యిక‌లో ఓ భారీ చిత్రం తెర‌పైకి రానున్నట్లు బాలీవుడ్ వ‌ర్గాల స‌మాచారం. ఈ చిత్రాన్ని రెడ్ చిల్లీస్ ఎంట‌ర్ టైన్ మెంట్స్ బ్యాన‌ర్ పై షారుఖ్ సొంత నిర్మాణ సంస్థ నిర్మించే అవ‌కాశాలే ఎక్కువ‌గా వున్న‌ట్లు తెలుస్తోంది.