షకలక శంకర్ సినిమా ఉందట

కమెడియన్‌ గా కొంచెం పేరు రాగానే హీరో వేషాలపై మోజు పుడుతుంటుంది చాలామందికి. ఆ కోవలో ఇప్పటికే చాలామంది హీరోలయ్యారు. ఇటీవలే షకలక శంకర్ సైతం ‘శంభో శంకర’ సినిమాతో హీరో అవతారం ఎత్తేశాడు. కానీ ఆ సినిమా అతడికి తీవ్ర నిరాశనే మిగిల్చింది. గత నెలాఖర్లో విడుదలైన ఈ చిత్రాన్ని ప్రేక్షకులు పట్టించుకోలేదు. పైగా ఈ చిత్ర ప్రమోషన్లలో శంకర్ కొందరు ప్రముఖులపై చేసిన అనుచిత వ్యాఖ్యలు అతడికి ప్రతికూలంగా మారాయి. ఈ స్థితిలో శంకర్ హీరోగా మరో సినిమా చేయగలడా.. కమెడియన్ గా కూడా అతడికి అవకాశాలు వస్తాయా అన్న సందేహాలున్నాయి. అసలు ‘శంభో శంకర’తో పాటే శంకర్ హీరోగా సెట్స్ మీదికి వెళ్లిన మరో సినిమా ‘డ్రైవర్ రాముడు’ సంగతే అటు ఇటు తేలకుండా ఉంది.

ఈ సినిమా గురించి స్వయంగా శంకరే నిరాసక్తత వ్యక్తం చేశాడు. ఒక పాట.. ఫైట్ తీశారని.. ఆ తర్వాత ఆ సినిమా ఏమైందో తనకు తెలియదని ‘శంభో శంకర’ ప్రమోషన్లలో చెప్పాడు. హీరోనే అలా అన్నాడంటే ఇక ఆ సినిమా ఆగిపోయినట్లే అనుకున్నారంతా. కానీ ఈ సినిమా ఉందనే అంటున్నారు దర్శక నిర్మాతలు. ‘డ్రైవర్ రాముడు’కు సంబంధించి షూటింగ్ అప్ డేట్ కూడా ఇచ్చారు. ప్రస్తుతం సినిమాకు సంబంధించి ఒక స్పెషల్ సాంగ్ తీస్తున్నట్లుగా ప్రెస్ నోట్ ఇచ్చారు. మరి కొన్ని రోజుల కిందటే ఈ సినిమా సంగతేంటో తనకు తెలియదన్న శంకర్.. ఇప్పుడు చిత్రీకరణలో పాల్గొంటున్నట్లే అనుకోవాలి. రాజ్ సత్య దర్శకత్వంలో తెరకెక్కుతున్న ఈ చిత్రాన్ని వేణుగోపాల్.. రాజు.. కీరత్ నిర్మిస్తున్నారు. శంకర్ తొలి సినిమా ఫలితం చూశాక కూడా ధైర్యంగా ఈ చిత్రాన్ని ముందుకు తీసుకెళ్తుండటం విశేషమే. మరి ఆ చిత్రమైనా శంకర్ కు హీరోగా మంచి ఫలితాన్నిస్తుందేమో చూడాలి.