ఫోటో స్టోరి: పాండే గాళ్ ఆట‌లు సాగేదెలా?

`అర్జున్ రెడ్డి` లాంటి బ్లాక్ బ‌స్ట‌ర్ చిత్రంతో టాలీవుడ్ లో అడుగుపెట్టిన షాలిని పాండే అటుపై `మ‌హాన‌టి` లాంటి క్లాసిక్ లో న‌టించి చ‌క్క‌ని ప్ర‌తిభావ‌ని అన్న పేరు తెచ్చుకుంది. అనుష్క `నిశ్శ‌బ్ధం`లోనూ షాలిని కీల‌క పాత్ర‌ను పోషించింది. ఇటీవ‌ల ఈ ట్యాలెంటెడ్ బ్యూటీ హిందీ ప‌రిశ్ర‌మ‌లోను ల‌క్ చెక్ చేసుకుంటోంది.

న‌టించిన ఆరంభ‌ సినిమాల‌తోనే పెర్ఫామ‌ర్ గా గుర్తింపు ద‌క్కించుకున్న షాలినీ పాండే బాలీవుడ్ లో ర‌ణ‌వీర్ స‌ర‌స‌న` జయేశ్ భాయ్ జోర్డార్` చిత్రంలో హీరోయిన్ గా న‌టించింది. దివ్యాంగ్ ట‌క్క‌ర్ ఈ చిత్రానికి ద‌ర్శ‌క‌త్వం వ‌హించ‌గా.. య‌శ్ రాజ్ ఫిలింస్ నిర్మించింది. ఇటీవ‌ల విడుద‌లైన ఈ చిత్రంలో షాలిని న‌ట‌న‌కు పేరొచ్చినా కానీ సినిమా హిట్టు కాలేదు.

అయితే జ‌యాప‌జ‌యాల‌తో సంబంధం లేకుండా వ‌రుస అవ‌కాశాలు అందుకుంటోంది షాలిని. అలాగే త‌న రూపంలో కూడా చాలా మార్పులు తెచ్చింది ఈ బ్యూటీ. ఇటీవ‌ల ఫిట్ నెస్ ప‌రంగా జాగ్ర‌త్తలు తీసుకుని స్లిమ్ లుక్ లోకి మారింది. వ‌రుస ఫోటోషూట్ల‌తోనూ షాలిని అభిమానుల‌కు ట‌చ్ లో ఉంది. తాజాగా బ్లాక్ అండ్ వైట్ క‌ల‌ర్ టోన్ తో షాలిని ఫోటోషూట్ వైర‌ల్ గా మారింది.

ఈ లుక్ చూడ‌గానే ఫిల్మ్‌ఫేర్ ట్రోఫీ లా క‌నిపిస్తోంది అన్న వ్యాఖ్య‌లు వినిపిస్తున్నాయి. ఇక షాలిని న‌టించిన‌ అర్జున్ రెడ్డి మూవీ జాతీయ అవార్డు ద‌క్కించుకున్న సంగ‌తి తెలిసిందే. మ‌హాన‌టి చిత్రానికి వివిధ కేట‌గిరీల్లో జాతీయ అవార్డులు వ‌రించాయి. జ‌యేష్ భాయ్ జోర్ధార్ కి కూడా అవార్డులు ద‌క్కే ఛాన్సుంద‌ని గుస‌గుసలు వినిపించాయి. మొత్తానికి షాలిని పాండే సెల‌క్టివ్ గా ముందుకు వెళుతూ న‌టిగా త‌న సినిమాల‌కు ప్ల‌స్ అవుతోంది. ఇప్పుడు హిందీ చిత్రం `మహారాజా`లో న‌టిస్తోంది. ద‌క్షిణాదినా ప‌లు చిత్రాల‌కు క‌మిటైంది. వాటి వివ‌రాలు వెల్ల‌డి కావాల్సి ఉంది.