వెబ్‌ సిరీస్ తో కాదు సినిమాతో ఆ స్టార్‌ హీరో భార్య రీ ఎంట్రీ

తమిళ స్టార్‌ హీరో అజిత్‌ భార్య షాలిని గతంలో హీరోయిన్‌ గా పలు సినిమాల్లో నటించిన విషయం తెల్సిందే. హీరోయిన్‌ గా ఆమె చేసిన సినిమా విడుదలై దాదాపుగా 20 ఏళ్లు అవుతుంది. ఈ ఇరువై ఏళ్లలో ఆమె కెమెరా ముందుకు వచ్చేందుకు ఆసక్తి చూపించలేదు. అజిత్‌ ను పెళ్లి చేసుకోవడం ఆ తర్వాత కుటుంబ బాధ్యతలు ఇతరత్ర కారణాల వల్ల ఆమె సినిమాలకు దూరంగా ఉంటూ వచ్చారు. ఆమద్య రీ ఎంట్రీ ఇవ్వాలనుకున్నా కూడా మంచి పాత్రల ఆఫర్‌ రాకపోవడంతో వెనక్కు తగ్గింది. మళ్లీ ఇన్నాళ్లకు అజిత్‌ భార్య షాలిని భారీ వెబ్‌ సిరీస్ లో కీలక పాత్రలో నటిస్తున్నట్లుగా వార్తలు వచ్చాయి. మణిరత్నం నిర్మాణంలో రూపొందుతున్న ఆ వెబ్‌ సిరీస్ లో షాలిని నటిస్తున్నట్లుగా ప్రచారం జరిగింది. కాని తమిళ సినీ వర్గాల నుండి అందుతున్న సమాచారం ప్రకారం మణిరత్నం వెబ్‌ సిరీస్ లో కాకుండా దర్శకత్వంలో వస్తున్న సినిమాలో ఆమె కనిపించబోతుందట.

మణిరత్నం డ్రీమ్ ప్రాజెక్ట్‌ పొన్నియిన్ సెల్వన్ లో ప్రముఖ నటీ నటులు కనిపించబోతున్నారు. భారీ ఛారిత్రాత్మక సినిమాగా రూపొందుతున్న ఈ సినిమా ను పాన్‌ ఇండియా రేంజ్ లో దర్శకుడు మణిరత్నం రూపొందిస్తున్నాడు. ఇప్పటికే ఈ సినిమాలో స్టార్స్ ను నటింపజేసేందుకు ఒప్పించాడు. తాజాగా షాలినిని కూడా ఈ సినిమాలో కీలక పాత్రకు గాను మణిరత్నం ఒప్పించాడనే వార్తలు వస్తున్నాయి. భారీ ఎత్తున అంచనాలున్న ఈ సినిమాలో షాలిని చేరికతో మరింతగా సినిమా వెయిట్‌ పెరగడం ఖాయం అంటున్నారు. అజిత్ సూపర్‌ స్టార్‌ గా వరుసగా సినిమాలు చేస్తూ సూపర్‌ హిట్‌ లు అందుకుంటున్న ఈ సమయంలో షాలిని కూడా రీ ఎంట్రీ ఇవ్వబోతున్న నేపథ్యంలో అభిమానులు ఆనందం వ్యక్తం చేస్తున్నారు.