తిడుతున్నా కానీ న‌ట‌వార‌సుల‌ను వ‌ద‌ల‌ని క‌ర‌ణ్

ఉర్రూత‌లూగించే డ్యాన్స్ వీడియోలతో ఇన్ స్టాగ్రామ్ లో సెగ‌లు పుట్టించిన స్టార్ కిడ్ షాన‌య క‌పూర్ డెబ్యూ మూవీ ఎట్ట‌కేల‌కు ఫిక్స‌య్యింది. జాన్వీ క‌పూర్.. అన‌న్య పాండేల‌ను వెండితెర‌కు పరిచ‌యం చేసిన క‌ర‌ణ్ జోహార్ ఇప్పుడు ఈ అమ్మ‌డిని కూడా ప‌రిచ‌యం చేస్తున్నారు.

ఆ మేర‌కు అధికారిక క‌న్ఫ‌ర్మేష‌న్ వ‌చ్చింది. ఇటీవ‌లే ధర్మ కార్నర్ ‌స్టోన్ ఏజెన్సీ (డిసిఎ) లో చేరాన‌ని షాన‌య స్వ‌యంగా ధృవీకరించారు. ఈ ఏడాది జూలైలో ధర్మ ప్రొడక్షన్స్ బ్యానర్ ‌లో తన మొదటి చిత్రానికి సంబంధించిన పనులను ప్రారంభించబోతోందట‌.

షాన‌య ఉత్సాహం చూస్తుంటే బాలీవుడ్ లో గుబులు రేపేందుకు చాలా ఉత్సాహంగా ఉంద‌ని అర్థ‌మ‌వుతోంది. షాన‌య‌ తల్లిదండ్రులు సంజయ్ కపూర్ - న‌టి మహీప్ కపూర్ ఇప్ప‌టికే కుమార్తెకు అన్ని విధాలా న‌ట‌న డ్యాన్సుల ప‌రంగా త‌ర్ఫీదును ఇచ్చారు. స్వ‌దేశీ విదేశీ శిక్ష‌ణ‌లు పూర్త‌య్యాయి. క‌ర‌ణ్ .. మ‌నీష్ మ‌ల్హోత్రా జోడీ ఈ అమ్మ‌డిని గొప్ప ఫ్యాష‌నిస్టాగా ప‌రిచ‌యం చేయ‌డ‌మే గాక‌.. క‌థానాయిక‌గానూ లైఫ్ ని ఇచ్చేందుకు చాలా చేస్తున్నారు మ‌రి. ఓవైపు న‌ట‌వార‌సుల‌తోనే సినిమాలు చేస్తున్నాడు! అంటూ ఔట్ సైడ‌ర్స్ నుంచి విమ‌ర్శ‌లు వెల్లువెత్తుతున్నా క‌ర‌ణ్ త‌న ప‌ని తాను చేసుకుపోతు‌న్నాడు.