నిన్న రాజమౌళి - నేడు శంకర్‌..

సౌత్‌ సినిమా స్థాయిని అమాంతం హాలీవుడ్‌ స్థాయికి తీసుకు వెళ్లిన దర్శకు రాజమౌళి మరియు శంకర్‌ లు అనడంలో ఎలాంటి సందేహం లేదు. వీరిద్దరు ఏదైనా సినిమా మొదలు పెట్టారు అంటే యుద్దం చేసినట్లుగానే వారి మేకింగ్‌ ఉంటుంది. చిన్న విషయంలో కూడా రాజీ పడకుండా చిత్రీకరణ చేస్తారు. బాహుబలి చిత్రంతో బాలీవుడ్‌ సినిమాలనే తలదన్నేలా సక్సెస్‌ ను దక్కించుకున్న రాజమౌళి తాజాగా ఎన్టీఆర్‌ మరియు చరణ్‌ లతో భారీ మల్టీస్టారర్‌ చిత్రాన్ని తెరకెక్కిస్తున్న విషయం తెల్సిందే. ఆ భారీ మల్టీస్టారర్‌ చిత్రం ఇటీవలే లాంచనంగా ప్రారంభం అయ్యింది. పలువురు సినీ ప్రముఖుల సమక్షంలో ఈ చిత్రం ప్రారంభం అయ్యింది.

ఇక శంకర్‌ ‘2.ఓ’ చిత్రాన్ని గత మూడు సంవత్సరాలుగా తెరకెక్కిస్తూనే ఉన్నాడు. ఎట్టకేలకు ఈ చిత్రం విడుదలకు సిద్దం అయ్యింది. బాలీవుడ్‌ సినిమాలకు కూడా అందనంత స్థాయి బడ్జెట్‌ తో రూపొందిన 2.ఓ చిత్రం ప్రపంచ వ్యాప్తంగా హాలీవుడ్‌ సినిమా స్థాయిలో విడుదల చేస్తున్నారు. ఇప్పటికే విడుదల అయిన ట్రైలర్‌ సినిమా పై అంచనాలు పెంచింది. 2.ఓ చిత్రం తర్వాత శంకర్‌ ఇండియన్‌ 2 చిత్రాన్ని తెరకెక్కించబోతున్నాడు.

చాలా సంవత్సరాల క్రితం వచ్చిన ‘భారతీయుడు’ చిత్రానికి ఇది సీక్వెల్‌ అనే విషయం తెల్సిందే. కమల్‌, శంకర్‌ ల కాంబోలో రూపొందబోతున్న ఇండియన్‌ 2 చిత్రం కూడా తాజాగా ప్రారంభం అయ్యింది. ఎలాంటి హడావుడి లేకుండా పూజా కార్యక్రమాలు పూర్తి చేశారు. షూటింగ్‌ ప్రారంభం అయినట్లుగా ఆర్ట్‌ డైరెక్టర్‌ ముత్తురాజ్‌ పేర్కొన్నాడు. ఇండియాలోనే టాప్‌ దర్శకులుగా పేరు దక్కించుకున్న రాజమౌళి మరియు శంకర్‌ లు ఒక్క రోజు తేడాతో సినిమాలను ప్రారంభించారు. ఈ రెండు సినిమాలు ఏ స్థాయిలో ఉంటాయో అని ఇప్పటి నుండే ప్రేక్షకులు ఎదురు చూస్తూ ఉన్నారు.