శంకర్‌ మాటతో ఆ సినిమా పైపైకి..!

సౌత్‌ ఇండియాలోనే కాకుండా ఇండియాలోనే బిగ్గెస్ట్‌ దర్శకుల జాబితాలో రాజమౌళి మరియు శంకర్‌ లు ముందు వరుసలో ఉంటారని చెప్పడంలో ఎలాంటి సందేహం లేదు. భారీ చిత్రాలకు పెట్టింది పేరైన వీరిద్దరు ఏ సినిమా గురించి మాట్లాడినా కూడా ఆ సినిమాకు హైప్‌ అమాంతం పెరగడం ఖాయం అని చెప్పుకోవచ్చు. అలాంటి ఈ దర్శకులు ఇద్దరు కూడా ఒకే సినిమా గురించి గొప్పగా మాట్లాడితే ఏమైనా ఉంది. ఆ సినిమా స్థాయి అమాంతం పైపైకి పోయినట్లే.

కన్నడంలో తెరకెక్కిన ‘కేజీఎఫ్‌’ చిత్రం గురించి వీరిద్దరు మాట్లాడారు. కన్నడ నాట యష్‌ హీరోగా విభిన్నమైన నేపథ్యంలో తెరకెక్కిన ఈ చిత్రం ఇప్పటికే ట్రైలర్‌ విడుదలై అందరి అంచనాలను పెంచేసింది. ట్రైలర్‌ చూస్తుంటే సినిమాలో ఏదో బలమైన మ్యాటర్‌ ఉందనే అభిప్రాయం వ్యక్తం అవుతుంది. ట్రైలర్‌ అన్ని భాషల్లో కలిపి కోటికి పైగా వ్యూస్‌ ను దక్కించుకున్న నేపథ్యంలో ఈ సినిమా స్థాయి ఏంటో చెప్పకనే చెప్పింది.

దర్శకుడు శంకర్‌ తాజాగా మీడియాతో మాట్లాడుతూ.. ఈమద్య కాలంలో సౌత్‌ సినిమాల స్థాయి బాగా పెరిగింది. భాషల హద్దులు చెరిగి పోయి, సినిమా పరిశ్రమల మద్య అంతరం తగ్గిందని అన్నాడు. కన్నడంలో తెరకెక్కిన కేజీఎఫ్‌ సినిమా గురించి ఉత్తరాధిన మాట్లాడుకోవడం జరుగుతుంది. కేజీఎఫ్‌ ట్రైలర్‌ చాలా బాగుందని అంటున్నారని శంకర్‌ పేర్కొన్నాడు. శంకర్‌ నోట ‘కేజీఎఫ్‌’ మాట రావడంతో సినిమాపై సౌత్‌ లోనే కాకుండా నార్త్‌ లో కూడా క్రేజ్‌ బాగా పెరిగింది. వచ్చే నెలలో విడుదల కాబోతున్న ‘కేజీఎఫ్‌’ చిత్రం కలెక్షన్స్‌ ఏ స్థాయిలో ఉంటాయో చూడాలి.