'ఇండియన్‌ 2' లో బాలీవుడ్‌ స్టార్‌

2.ఓ వంటి హాలీవుడ్‌ స్థాయి మూవీని తెరకెక్కించిన దర్శకుడు శంకర్‌ ప్రస్తుతం యూనివర్శిల్‌ స్టార్‌ కమల్‌ హాసన్‌ తో 'ఇండియన్‌ 2' చిత్రాన్ని తెరకెక్కిస్తున్న విషయం తెల్సిందే. భారీ అంచనాల నడుమ రూపొందుతున్న ఇండియన్‌ 2 చిత్రం షూటింగ్‌ ప్రస్తుతం రాజమండ్రి సెంట్రల్‌ జైల్‌ లో జరుపుతున్నారు. కమల్‌ హాసన్‌ రెండు విభిన్నమైన గెటప్స్‌ లో ఈ చిత్రంలో కనిపించబోతున్నాడు. ఇక ఈ చిత్రంలో విలన్‌ పాత్ర గురించి ప్రస్తుతం చర్చ జరుగుతోంది.

ఇటీవల దర్శకుడు శంకర్‌ తో అనీల్‌ కపూర్‌ ఉన్న ఫొటో సోషల్‌ మీడియాలో వైరల్‌ అయ్యింది. వీరిద్దరి కలయికకు కారణం 'ఇండియన్‌ 2' అంటూ చర్చ జరుగుతోంది. ఇండియన్‌ 2 చిత్రం కోసమే వీరిద్దరు కలిసి ఉంటారని అంటున్నాడు. ఈ చిత్రాన్ని బాలీవుడ్‌ రేంజ్‌ లో తెరకెక్కించేందుకు.. అక్కడ మంచి బిజినెస్‌ చేసేందుకు బాలీవుడ్‌ స్టార్స్‌ ను నటింపజేయాలని మొదటి నుండి శంకర్‌ భావించాడు. అందుకే ఈ చిత్రంలో విలన్‌ పాత్రకు గాను అనీల్‌ కపూర్‌ ను ఎంపిక చేసుకున్నట్లుగా అనిపిస్తుంది.

శంకర్‌ గత చిత్రం 2.ఓ చిత్రంలో బాలీవుడ్‌ స్టార్‌ హీరో అక్షయ్‌ కుమార్‌ విలన్‌ గా నటించాడు. బాలీవుడ్‌ లో అక్షయ్‌ కుమార్‌ కారణంగా భారీ బిజినెస్‌ జరగడంతో పాటు మంచి వసూళ్లను కూడా రాబట్టింది. అందుకే ఇప్పుడు అనీల్‌ కపూర్‌ ను కూడా అదే ఉద్దేశ్యంతో దర్శకుడు శంకర్‌ 'ఇండియన్‌ 2' చిత్రంలో భాగస్వామ్యం చేసి ఉంటాడనిపిస్తుంది. తెలుగు ఇండస్ట్రీ నుండి కూడా ఈ చిత్రంలో నటించబోతున్నారు. కాజల్‌ హీరోయిన్‌ గా నటిస్తున్న ఈ చిత్రంను వచ్చే ఏడాదిలో ప్రేక్షకుల ముందుకు తీసుకు రాబోతున్నారు. చాలా ఏళ్ల క్రితం వచ్చిన భారతీయుడు చిత్రానికి ఇది సీక్వెల్‌ అనే విషయం తెల్సిందే.