శంకర్ డైరెక్షన్.. రామ్ చరణ్ యాక్షన్.. మెగాస్టార్ ఫుల్ హ్యాపీస్!

కొన్ని కాంబోల‌ కోసం ఎంత‌గానో ఎదురు చూడాల్సి వ‌స్తుంది.. అయిన‌ప్ప‌టికీ సాధ్యం కాక‌పోవ‌చ్చు! మ‌రికొన్ని కాంబినేష‌న్లు ఉంటాయి.. అనుకోకుండానే క్రియేట్ అవుతాయి.. సెన్సేష‌న్ క్రియేట్ చేస్తాయి! ఇప్పుడు అలాంటి సెన్సేష‌నల్ కాంబినేష‌న్ ఒక‌టి సెట్ అయిపోయింది. అదే దిగ్గ‌జ ద‌ర్శ‌కుడు శంక‌ర్ - మెగా ప‌వ‌ర్ స్టార్ రామ్ చ‌ర‌ణ్ కాంబినేష‌న్‌!

కొన్ని రోజులుగా చ‌క్క‌ర్లు కొడుతున్న ఈ వార్త‌.. వాస్త‌వ రూపం దాల్చింది. స్వ‌యంగా రామ్ చరణ‌్ ఈ విష‌యాన్ని రివీల్ చేయ‌డం విశేషం. ట్విట‌ర్ లో పోస్ట్ చేసిన చెర్రీ.. ‘శంకర్‌ సార్‌ వంటి సినీ మేధావి దర్శకత్వంలో నా చిత్రం కూడా ఉండబోతున్నందుకు చాలా సంతోషంగా ఉంది' అంటూ ట్వీట్‌ చేశారు.ఈ చిత్రాన్ని ప్రముఖ నిర్మాత దిల్‌రాజు నిర్మిస్తున్నారు. అయితే.. ఈ చిత్రం ఇద్దరికీ మైల్ స్టోన్ గా నిలవబోతోంది. ఈ సినిమా ఎస్‌వీసీ బ్యానర్‌లో 50వ చిత్రం కాబోతుండగా.. రామ్ చరణ్ కెరీర్ లో 15వ సినిమాగా నిలవబోతోంది.

కాగా.. ఈ విషయాన్ని మెగాస్టార్ చిరంజీవి కూడా ధృవీక‌రించి, త‌న ఆనందాన్ని ప్ర‌క‌టించారు. రామ్ చ‌ర‌ణ్ ట్విట‌ర్ పోస్టును రీట్వీట్ చేసిన చిరు.. శంకర్ లాంటి డైరెక్టర్ సినిమాలో చెర్రీ నటిస్తుండడం ఎంతో సంతోషంగా ఉందన్నారు. సినిమానే పాషన్ గా మార్చుకొని భారతీయ సినిమా స్థాయిని పెంచుతున్న దర్శకులతో రామ్ చరణ్ పనిచేస్తుండడం ఎంతో గొప్పగా ఉందని అన్నారు చిరంజీవి.

ఇక, ఈ విషయంలో ఎస్‌వీసీ సంస్థ కూడా స్పందించింది. శంకర్ - రాంచరణ్‌ కాంబినేషన్‌లో రాబోయే సినిమా తమ బ్యానర్ కు ఓ మైలురాయిగా నిలవబోతోందన్న మేకర్స్.. ఈ మూవీకి సంబంధించిన ఇతర వివరాల గురించి త్వరలో వెల్లడిస్తామని ప్రకటించారు.