2.0.. చప్పుడు లేదే

2.0 సంక్రాంతి వరకు ఆడే సినిమా అన్నాడు ఈ చిత్రాన్ని తెలంగాణలో డిస్ట్రిబ్యూట్ చేసిన దిల్ రాజు. నిజానికి ఈ సిినిమా బ్రేక్ ఈవెన్ కు రావాలంటే నిజంగానే సంక్రాంతి వరకు ఆడాలి. ఎందుకంటే ‘2.0’ తెలుగు హక్కుల్ని ఏకంగా రూ.72 కోట్లు పెట్టి కొన్నారు. రజనీకి తెలుగు రాష్ట్రాల్లో ఎంత ఫాలోయింగ్ ఉన్నప్పటికీ ఆయన సినిమా ఏది కూడా ఇప్పటిదాకా ఇక్కడ రూ.30 కోట్లకు మించి షేర్ రాబట్టలేదు. అలాంటిది రూ.70 కోట్ల మార్కును దాటాలంటే బాక్సాఫీస్ దగ్గర అసాధారణ ప్రదర్శన చేయాలి. ఐతే అందుకు తగ్గ టాక్ సినిమాకు రాలేదు. అయినప్పటికీ సోలోగా రిలీజ్ కావడంతో ఈ చిత్రం ఉన్నంతలో బాగానే ఆడింది.

రెండు.. మూడు వారాల్లోనూ చెప్పుకోదగ్గ స్థాయిలో షేర్ సాధించింది. రూ.50 కోట్ల షేర్ మార్కును కూడా దాటింది. కానీ ఆ తర్వాత మాత్రం సినిమా ముందుకు సాగలేకపోయింది. క్రిస్మస్‌ కు వచ్చిన కొత్త సినిమాల మీదికి ప్రేక్షకుల ఫోకస్ మళ్లింది. కొన్ని చోట్ల త్రీడీ స్క్రీన్లలో ఓ మోస్తరుగా వసూళ్లు వస్తున్నాయి కానీ.. ఓవరాల్‌ గా చూస్తే ‘2.0’ కథ ముగిసినట్లే కనిపిస్తోంది. గత వారం నుంచి ‘2.0’ గురించి ఎక్కడా డిస్కషన్ లేదు. వసూళ్ల గురించి అప్ డేట్లు ఆగిపోయాయి. తెలుగు రాష్ట్రాల్లో ఈ చిత్రం కనీసం రూ.15 కోట్ల దాకా నష్టం తెచ్చి పెట్టనున్నట్లు ట్రేడ్ పండిట్లు చెబుతున్నారు. తమిళంలో నష్టాలు ఇంకా ఎక్కువ స్థాయిలో ఉన్నట్లు తెలుస్తోంది. ఒక్క హిందీ వెర్షన్ మాత్రమే లాభాలు తెచ్చింది. అక్కడ ఈ చిత్రాన్ని కరణ్ జోహార్ రిలీజ్ చేసిన సంగతి తెలిసిందే.