అప్పుడు కార్తికేయ.. ఇప్పుడు శంకరాభరణం

గత ఏడాది టాలీవుడ్‌లో అతి పెద్ద హిట్టు ఏది అంటే రేసుగుర్రం - లెజెండ్ - ఎవడు - మనం లాంటి సినిమాల గురించి చర్చ జరుగుతుంది. కానీ వాస్తవం ఏంటంటే.. వాటన్నిటికంటే పెద్ద హిట్టు కార్తికేయ. మొత్తం వసూళ్లు ఎంత అన్నది కాకుండా.. పెట్టుబడి మీద ఎక్కువ లాభం దేనికి వచ్చిందన్న లెక్కలు తీస్తే ‘కార్తికేయ’ను మించిన బ్లాక్ బస్టర్ ఏదీ ఉండదు. పెట్టుబడి మీద మూడు రెట్లకు పైనే వసూలు చేసిందీ సినిమా. చందూ మొండేటి దర్శకత్వం వహించిన ఈ సినిమాతో నిఖిల్ రేంజే మారిపోయింది. తన కెరీర్ ను సరికొత్త హైట్స్ కు తీసుకెళ్లిన ‘కార్తికేయ’ను నిఖిల్ ఎప్పటికీ మరిచిపోలేడు. కార్తికేయ సెంటిమెంటు కలిసొచ్చేలా గత ఏడాది ఆ సినిమా విడుదలైన దీపావళికే ఈ ఏడాది తన కొత్త సినిమాను ప్రేక్షకుల ముందుకు తేబోతున్నాడు నిఖిల్.

కోన వెంకట రచించి, నిర్మిస్తున్న ఈ క్రైమ్ కామెడీని దీపావళికి విడుదల చేయబోతున్నట్లు ప్రకటించారు. ఉదయ్ నందనవనం అనే కొత్త దర్శకుడు ఈ సినిమాతో టాలీవుడ్ కు పరిచయమవుతున్నాడు. నిఖిల్ సరసన నందిత హీరోయిన్ గా నటిస్తోంది. ఈ సినిమా విశేషాల గురించి కోన వెంకట్ మాట్లాడుతూ.. ‘‘ప్రపంచంలో సుఖపడేవాళ్లు, కష్టపడేవాళ్లు.. ఇలా రెండే జాతులుంటాయని నమ్ముతాడు హీరో. తాను సుఖపడ్డానికే పుట్టానని అనుకుంటాడు. ఐతే ఈ ఎన్నారై హీరో ఇండియాకు ఓ పని మీద వచ్చి కష్టాల్లో పడతాడు. వాటి నుంచి ఎలా తప్పించుకున్నాడన్నదే ఈ కథాంశం. అంజలి ఇందులో స్పెషల్ క్యారెక్టర్ చేసింది. 40 మంది దాకా ప్రముఖ తారాగణం నటించారు. భారీ నిర్మాణ వ్యయంతో ఈ సినిమా పూర్తి చేశాం. దీపావళికి విడుదల చేస్తాం’’ అని చెప్పాడు.