Begin typing your search above and press return to search.
ట్రైలర్ టాక్‌: నిఖిల్ చిన్న చేప కాదు!
By: Tupaki Desk | 1 Nov 2015 7:36 AM GMTఅప్ప‌టికే స్టార్ గా గుర్తింపు తెచ్చుకొన్న హీరోకి వ‌రుస‌గా మూడు హిట్లొస్తే ఆ క్రేజ్ ఎలా ఉంటుంది? దుమ్ము లేచిపోద్దంతే. అదే ఒక చిన్న హీరోకి వ‌రుస‌గా మూడు హిట్లొస్తే? ఇంచు మించు స్టార్ స్టేట‌స్ వ‌చ్చేసిన‌ట్టవుద్ది. నిఖిల్ విష‌యంలో అదే జ‌రిగింది. స్వామిరారా - కార్తికేయ - సూర్య వ‌ర్సెస్ సూర్య చిత్రాల‌తో నిఖిల్ రేంజే మారిపోయింది. ఆయ‌న్నుంచి వ‌చ్చే సినిమాల‌కి ఇటీవ‌ల య‌మా క్రేజ్ ల‌భిస్తోంది. కోన అండ్ టీమ్‌ తో క‌లిసి నిఖిల్ సినిమా చేయ‌బోతున్నాడ‌న్న వార్త రాగానే `శంక‌రాభ‌ర‌ణం`పై భారీగా అంచ‌నాలు క్రియేట్ అయ్యాయి. అందుకే ఆ సినిమా సెట్స్‌ పై ఉండ‌గానే బిజినెస్ పూర్త‌యిపోయింది. అయితే ఆ క్రేజ్ కి ధీటుగానే సినిమాని తీర్చిదిద్దార‌ని తెలుస్తోంది. ఇదివ‌ర‌కు విడుద‌లైన టీజ‌ర్‌, ఇటీవ‌ల విడుద‌లైన ట్రైలర్ లే ఆ విష‌యాన్ని చాటిచెబుతున్నాయి.
శంక‌రాభ‌ర‌ణం ట్రైలర్ చూశాక నిఖిల్ చిన్న చేప‌కి కాదు... ఈసారి తిమింగ‌లంపైనే దృష్టిపెట్టాడ‌ని స్ప‌ష్టంగా అర్థమైంది. సినిమాలో విల‌న్ సంప‌త్ `ఇలా చిన్న చేప‌ల్ని ప‌ట్ట‌డం ఎంత కాలంరా... ఒక తిమింగ‌లం దొర‌కాలి` అంటూ డైలాగ్ చెబుతాడు. సంప‌త్ ఆ సంభాష‌ణ ఏ సంద‌ర్భంలో చెప్పాడో తెలియ‌దు కానీ... నిఖిల్ మాత్రం ఇదివ‌ర‌కు వ‌చ్చిన విజ‌యాల్లా కాకుండా తిమింగ‌లం స్థాయి భారీ స‌క్సెస్‌ని కొట్టాల‌నే ఉద్దేశంతోనే శంక‌రాభ‌ర‌ణం చేసిన‌ట్టు అర్థ‌మ‌వుతోంది. అందుకు త‌గ్గ‌ట్టుగానే శంక‌రాభ‌ర‌ణంపై హైప్ క్రియేట్ అయ్యింది. ఆ హైప్ ని మ‌రింత‌గా పెంచేలా కోన వెంక‌ట్ ఈ సినిమాకి వేడుక‌ల్ని జ‌రుపుతున్నాడు. టీజ‌ర్‌ ని ప‌వ‌న్‌ క‌ల్యాణ్‌ తో విడుద‌ల చేయించాడు. ఆడియోకి స‌మంత లాంటి స్టార్ భామ‌ల్ని తీసుకొచ్చాడు. దీంతో ప్రేక్ష‌కులు శంక‌రాభ‌ర‌ణం గురించి మ‌రింత ఇదిగా మాట్లాడుకోవ‌డం మొద‌లైంది.
ఇటీవ‌ల విడుద‌లైన ట్రైలర్, అందులోని విజువ‌ల్స్ అయితే బాలీవుడ్ సినిమాల్ని త‌ల‌పిస్తున్నాయి. లాంగ్ షాట్స్‌ లో కొన్ని విజువ‌ల్స్ ఇది తిమింగ‌లంలాంటి సినిమానే అన్న భావ‌న‌ని క్రియేట్ చేస్తున్నాయి. అలాగే కోన వెంక‌ట్ శైలి పంచ్‌లు కూడా బాగానే పేలాయి. స‌ప్త‌గిరి, థ‌ర్టీ ఇయ‌ర్స్ పృథ్వీలాంటివాళ్లు భారీగా సంద‌డి చేసిన‌ట్టు అర్థ‌మ‌వుతోంది. క‌బ్ ఆయేగా అస్లీ దివాలి అంటూ రాజోలు బ్యూటీ అంజ‌లి కొస‌మెరుపులాగా ఊరిస్తుండ‌డ‌టం కుర్ర‌కారుకి భ‌లే కిక్కిస్తోంది. మొత్తంగా థియేట్రిక‌ల్ ట్రైలర్ విడుద‌ల‌వ్వ‌గానే శంక‌రాభ‌ర‌ణం రూపంలో మ‌రో హిట్టు సినిమా రాబోతోంద‌న్న అభిప్రాయం ఇండ‌స్ట్రీ వ‌ర్గాల్లో స్ప‌ష్టంగా క‌నిపించింది. ప్ర‌స్తుతం ఆన్‌ లైన్‌ లో బాగా సంద‌డి చేస్తున్న ట్రైల‌ర్ల‌లో శంక‌రాభ‌ర‌ణం ఒక‌టి. అన్న‌ట్టు ఈ సినిమాని దీపావ‌ళికే ప్రేక్ష‌కుల ముందుకు తీసుకొస్తున్న‌ట్టు స‌మాచారం. ఉదయ్ నందనవనం దర్శకత్వం వహించిన ఈ చిత్రంలో నిఖిల్, నందిత జంటగా నటించారు
