పవన్ స్కూల్లో అతనో స్టూడెంటట

పవన్ కళ్యాణ్ ను పొగడ్తలతో చంపేస్తున్నారు ‘సర్దార్ గబ్బర్ సింగ్’ టీమ్ సభ్యులు. ఇప్పటికే డైరెక్టర్ బాబి.. హీరోయిన్ కాజల్ అగర్వాల్.. ఆర్ట్ డైరెక్టర్ బ్రహ్మ కడలి.. ఇలా ఒక్కొక్కరు పవన్ ను ఆకాశానికెత్తేశారు. ఇప్పుడు ఈ సినిమాలో విలన్ పాత్ర పోషించిన శరద్ ఖేల్కర్ కూడా లైన్లోకి వచ్చేశాడు. తొలిసారి తెలుగులో సినిమా చేసిన ఈ బాలీవుడ్ నటుడు పవర్ స్టార్ ను ఆకాశానికెత్తేస్తున్నాడు.

పవన్ ఓ ఇన్ స్టిట్యూషన్ లాంటి వాడినని తాను అందులో ఓ విద్యార్థినని అంటున్నాడు శరద్ ఖేల్కర్. ‘సర్దార్ గబ్బర్ సింగ్’ సినిమాలో నటించిన అనుభవాన్ని తాను ఎప్పటికీ మరిచిపోలేనని.. ఈ సినిమా విషయంలో పవన్ తనకు ఎంతో స్వేచ్ఛ ఇచ్చాడని శరద్ తెలిపాడు. ప్రతి సన్నివేశాన్ని తన తరహాలో తాను చేస్తానని పవన్ కు చెప్పానని.. అతను ఏమాత్రం అభ్యంతర పెట్టలేదని శరద్ చెప్పాడు. పవన్ ఓ క్రియేటివ్ జీనియస్ అని.. అతడి క్రియేటివిటీ సినిమాకు చాలా ఉపయోగపడిందని అతనన్నాడు.

పవన్ ఓ స్వీట్ హార్ట్ అని కూడా శరద్ కితాబిచ్చాడు. పవన్ తో నటించడంతో తన కల నెరవేరినట్లయిందని కూడా శరద్ అన్నాడు. 2004లో విడుదలైన ‘హల్ చల్’ సినిమాతో బాలీవుడ్ కు పరిచయమైన శరద్.. 1920-ఈవిల్ రిటర్న్స్-రామ్ లీలా-హీరో-రాకీ హ్యాండ్సమ్ లాంటి సినిమాలతో మంచి పేరే సంపాదించాడు. అక్షయ్ కుమార్ హీరోగా తెరకెక్కిన ‘రుస్తుమ్’లోనూ అతనో కీలక పాత్ర పోషించాడు.