పవర్ స్టార్ తర్వాత నార్త్ స్టార్ వారి సినిమా ఇదే!

ప్రొడ్యూసర్ శరత్ మరార్ పేరు వినగానే మనకు పవర్ స్టార్ పవన్ కళ్యాణ్ గుర్తుకొస్తారు. గతంలో పవన్ కళ్యాణ్ కు చాలా సన్నిహితుడిగా మెలిగిన ఆయన పవన్ తో నార్త్ స్టార్ ఎంటర్టైన్మెంట్స్ బ్యానర్ పై మూడు సినిమాలు నిర్మించారు. ఆ తర్వాత 'అదిరింది'.. 'కర్తవ్యం' లాంటి తమిళ డబ్బింగ్ సినిమాలను తెలుగులో విడుదల చేశారు గానీ మరో సినిమాను నిర్మించలేదు.

తాజాగా నార్త్ స్టార్ వారి కొత్త సినిమా ప్రకటన వచ్చింది. నార్త్ స్టార్ వారి అధికారిక ట్విట్టర్ హ్యాండిల్ ద్వారా ప్రముఖ దర్శకుడు సుకుమార్ తో కలిసి ఒక సినిమా నిర్మిస్తున్నామని.. తమ సినిమాలో యువ హీరో నాగశౌర్య లీడ్ రోల్ లో నటిస్తాడని తెలిపారు. ఈ సినిమాకు సుకుమార్ అసోసియేట్ కాశి విశాల్ దర్శకత్వం వహిస్తాడని వెల్లడించారు. కాశి విశాల్ 'ఆర్య-2'.. '100% లవ్'.. '1-నేనొక్కడినే' .. 'నాన్నకు ప్రేమతో'.. 'రంగస్థలం' సినిమాలకు పనిచేశాడు.

సుకుమార్ ఈమధ్య తన శిష్యులను దర్శకులుగా పరిచయయం చేస్తూ ఇతర నిర్మాతలతో కలిసి సంయుక్తంగా సినిమాలు నిర్మిస్తున్న సంగతి తెలిసిందే. ఇప్పటికే అలా రెండు మూడు సినిమాల ప్రకటనలు వచ్చాయి. సుకుమార్ లిస్టులో ఇది మరో సినిమా. ఇక శరత్ మరార్ విషయనికి వస్తే.. పవన్ తో కాకుండా మరో హీరో తో ఆయన సినిమాను నిర్మించడం ఇదే ప్రథమం. మరి వరస ఫ్లాపులతో ఇబ్బంది పడుతున్న నాగ శౌర్యకు సుకుమార్ - శరత్ మరార్ - కాశి విశాల్ కాంబో విజయాన్ని అందిస్తుందేమో వేచి చూడాలి.