కింగ్ ఖాన్ నెక్స్ట్ సినిమా డైరెక్టర్ ఆయనేనా..?

బాలీవుడ్ బాద్షా షారుఖ్ ఖాన్ చివరగా తెరమీద కనిపించిన సినిమా జీరో. ఆ సినిమా వచ్చి ఏడాదిన్నర అయిపోయింది. కానీ ఇంతవరకు షారుఖ్ నుండి తన కొత్త సినిమాకు సంబంధించిన వార్త బయటికి రాలేదు. నిజానికి జీరో సినిమా పై షారుఖ్ ఎన్నో ఆశలు పెట్టుకున్నాడు. కానీ సినిమా మాత్రం షారుఖ్ ని ఘోరంగా దెబ్బకొట్టింది. ఆ సినిమా మిగిల్చిన నష్టం నుండి కోలుకోవడానికే షారుఖ్ ఇంత గ్యాప్ తీసుకుంటున్నాడేమో.. అని అనుకుంటున్నారంతా. నిజంగానే షారుఖ్ అదే కారణంతో బయటికి రావట్లేదా అని సందేహాలు వ్యక్తం అవుతున్నాయి. షారుఖ్ కెరీర్లో గతంలో కూడా ఫ్లాపులున్నాయి కానీ.. జీరో మాత్రం నిజంగా జీరోని చేసింది.

గడిచిన ఏడాదిన్నర కాలంలో షారుఖ్ నెక్స్ట్ సినిమా గురించి రకరకాల రూమర్స్ స్ప్రెడ్ అయ్యాయి. తమిళ దర్శకుడు అట్లీతో సినిమా ఓకే చేసాడని.. స్టార్ డైరెక్టర్ రాజ్ కుమార్ హిరానితో షారుఖ్ సినిమా ఉంటుందని మీడియాలో ప్రచారాలు భారీగానే జరిగాయి. అయితే అవన్నీ వట్టి పుకార్లని ఎందులోనూ నిజం లేదని తేలింది. ఇదిలా ఉండగా.. తాజాగా ట్విట్టర్లో అభిమానులతో ముచ్చటించిన షారుఖ్.. కొన్ని ఆసక్తికర విషయాలతో పాటు తన తర్వాత సినిమా గురించి కూడా న్యూస్ లీక్ చేసాడట.

కొందరు అభిమానులు అడిగిన ప్రశ్నలకు ఎంతో ఓపికతో సమాధానం ఇచ్చిన షారుఖ్.. హాలీవుడ్ దర్శకుల్లో మార్టిన్ స్కోర్సీస్‌తో పని చేస్తారా.. లేక క్రిస్టఫర్ నోలన్‌తో చేస్తారా? అనే ప్రశ్నకు.. వాళ్లిద్దరినీ తాను కలిశానని. ఇద్దరూ గొప్ప దర్శకులే అని బదులిచ్చాడు. అయితే మనకు ‘రాజ్ కుమార్ హిరాని ఉన్నాడు కదా’ అంటూ కొసమెరుపులా అన్నాడు. దీంతో షారుఖ్ నెక్స్ట్ సినిమా రాజ్ కుమార్‌ హిరానితోనే చేయబోతున్నానని కథనాలు వెలువడుతున్నాయి. షారుఖ్ కూడా హిరానీతో సినిమా చేయడానికి సిద్దంగానే ఉన్నాడట. అధికారికంగా ప్రకటన రానప్పటికీ ఈ ఏడాది గుడ్ న్యూస్ అందుతుందేమో అని అభిమానులు ఎదురు చూస్తున్నారు.