కొత్త జంట భలే ఉందబ్బా..

కొన్ని తెరమీద చూస్తే భలే ముచ్చటగా అనిపిస్తుంది. ఈ మధ్య ‘నేను లోకల్’లో నాని-కీర్తి సురేష్ జంట అలాగే కనువిందు చేసింది. సంక్రాంతికి వచ్చిన ‘శతమానం భవతి’లో శర్వానంద్-అనుపమ పరమేశ్వరన్ జోడీ కూడా తెలుగు ప్రేక్షకుల్ని బాగా ఆకట్టుకుంది. ఇప్పుడు శర్వాకు మరో అమ్మాయితో చక్కటి జోడీ కుదిరింది. ఆ హీరోయిన్ మరెవరో కాదు.. లావణ్య త్రిపాఠి. శర్వా కొత్త సినిమా ‘రాధ’లో లావణ్యనే హీరోయిన్. ఈ చిత్ర టీజర్ లాంచ్ చేయనున్న నేపథ్యంలో ముందుగా ఈ జోడీ ఫస్ట్ లుక్ ను పరిచయం చేసింది చిత్ర యూనిట్. శర్వా-లావణ్య మధ్య కెమిస్ట్రీ అదిరిపోతుందని.. ఈ జోడీ కనువిందు చేయబోతోందని ఈ పోస్టర్ చూస్తే అర్థమవుతోంది.

‘రాధ’ అనే పాజటివ్ టైటిల్ కు తోడు.. హీరో హీరోయిన్ల జంట కూడా చూడముచ్చటగా ఉండటంతో టీజర్ కోసం జనాలు ఆసక్తిగా ఎదురు చూస్తున్నారు. టీజర్ కూడా బాగుంటే సినిమాకు కూడా మంచి హైప్ వచ్చే అవకాశముంది. శర్వా వరుసగా నాలుగు హిట్లతో ఊపుమీదుంటే.. లావణ్య ‘శ్రీరస్తు శుభమస్తు’ లాంటి డీసెంట్ మూవీ తర్వాత ఈ చిత్రంతో ప్రేక్షకుల్ని పలకరించనుంది. ఇంతకుముందు ‘భలే భలే మగాడివోయ్’లో నానితో లావణ్య కెమిస్ట్రీ చక్కగా పండింది. ఇప్పుడు శర్వాతో ఆమె కెమిస్ట్రీ సినిమాకు హైలైట్ అవుతుందని భావిస్తున్నారు. కొత్త దర్శకుడు చంద్ర మోహన్ రూపొందిస్తున్న ఈ చిత్రాన్ని అగ్ర నిర్మాత బి.వి.ఎస్.ఎన్.ప్రసాద్ నిర్మిస్తున్నాడు.