మరో డెబ్యూ డైరెక్టర్‌ కి ఛాన్స్ ఇస్తున్న టాలెంటెడ్ హీరో..?

టాలెంటెడ్ హీరో శ‌ర్వానంద్ హిట్ ప్లాపులతో సంబంధం లేకుండా వరుస సినిమాలను అనౌన్స్ చేస్తూ వస్తున్నాడు. 'ప‌డి ప‌డి లేచే మ‌న‌సు' 'ర‌ణ రంగం' 'జాను' చిత్రాలు ఆశించిన విజ‌యాన్ని సాధించ‌క‌పోవ‌డంతో ఎలాగైనా హిట్ కొట్టి కెరీర్ ని గాడిలో పెట్టాలనే కసితో వర్క్ చేస్తున్నాడు శర్వా. ఒకవైపు కొత్త దర్శకులు మరోవైపు సక్సెస్‌ ఫుల్‌ డైరెక్టర్ల సినిమాలకు గ్రీన్ సిగ్నల్ ఇస్తున్నాడు. ముందుగా బి. కిషోర్ రెడ్డి అనే కొత్త దర్శకుడిని ఇండస్ట్రీకి పరిచయం చేస్తూ 'శ్రీకారం' అనే సినిమాకి శ్రీకారం చుట్టాడు. 14 రీల్స్ రామ్ ఆచంట - గోపీచంద్ ఆచంట నిర్మిస్తున్న ఈ సినిమా షూటింగ్ ఫైనల్ స్టేజిలో ఉంది. ఇదే క్రమంలో ఎస్.ఆర్ ప్రభు నిర్మాణంలో శ్రీ కార్తీక్ అనే మరో కొత్త దర్శకుడిని పరిచయం చేస్తూ ఓ తెలుగు తమిళ ద్విభాషా చిత్రం చేస్తున్నాడు.

ఇటీవలే 'Rx 100' ఫేమ్ అజయ్ భూపతి దర్శకత్వంలో 'మహాసముద్రం' అనే చిత్రాన్ని ప్రకటించాడు శర్వా. మరో హీరో బొమ్మరిల్లు సిద్దార్థ్ తో కలిసి స్క్రీన్ షేర్ చేసుకోబోతున్న ఈ చిత్రాన్ని ఏకే ఎంటర్టైన్మెంట్స్ బ్యానర్ పై సుంకర రామబ్రహ్మం నిర్మించనున్నారు. దీంతో పాటు ఏసియన్ సోనాలి నారంగ్ సమర్పణలో ఓ సినిమాకి కమిట్ అయ్యాడు. వీటితో పాటు 'నేను శైల‌జ' ఫేమ్ కిశోర్ తిరుమ‌ల దర్శకత్వంలో 'ఆడాళ్లు మీకు జోహార్లు' అనే చిత్రాన్ని లాంఛనంగా ప్రారంభించాడు. ఈ ఫ్యామిలీ ఎంట‌ర్టైన‌ర్ ని శ్రీ లక్ష్మీ వెంకటేశ్వర సినిమాస్‌ బ్యానర్ పై సుధాక‌ర్ చెరుకూరి నిర్మించనున్నారు. ఇప్పుడు ఇదే క్రమంలో మరో కొత్త దర్శకుడికి శర్వానంద్‌ ఛాన్స్ ఇవ్వనున్నాడని ఇండస్ట్రీ వర్గాల్లో అనుకుంటున్నారు. 'వెన్నెల' 'ప్రస్థానం' 'ఆటోనగర్' చిత్రాల దర్శకడు దేవాకట్ట దగ్గర డైరెక్షన్ డిపార్ట్మెంట్ లో వర్క్ చేసిన శ్రీరామ్‌ తో శర్వా ఓ మూవీ చేయనున్నాడట. ఇప్పటికే శ్రీరామ్‌ చెప్పిన స్టోరీ లైన్ నచ్చడంతో పూర్తి స్క్రిప్ట్ తో రమ్మని శర్వానంద్‌ చెప్పాడట. ఈ ప్రాజెక్ట్ ని ప్రముఖ నిర్మాణ సంస్థ యూవీ క్రియేషన్స్‌ నిర్మించే అవకాశం ఉంది.