'ఎక్స్ ప్రెస్ రాజా' కాంబినేషన్ రిపీట్ కానుందా..?

'వెంకటాద్రి ఎక్స్ ప్రెస్' సినిమాతో దర్శకుడిగా పరిచయం అయ్యాడు మేర్ల‌పాక గాంధీ. ఫస్ట్ సినిమాతోనే హిట్ అందుకున్న గాంధీ.. శర్వానంద్ తో 'ఎక్స్ ప్రెస్ రాజా' అనే మూవీ తెరకెక్కించి మరో హిట్ కొట్టాడు. ఈ క్రమంలో నేచురల్ స్టార్ నాని తో 'కృష్ణార్జున యుద్ధం' అనే సినిమా తీసాడు. ఇది ఆశించిన స్థాయిలో విజయం సాధించకపోవడంతో కాస్త గ్యాప్ తీసుకున్నాడు గాంధీ. ఇటీవలే యూత్ స్టార్ నితిన్ తో ఓ సినిమా అనౌన్స్ చేసాడు. ఇది హిందీలో సూపర్ హిట్ అయిన 'అంధాదున్' చిత్రానికి తెలుగు రీమేక్ గా రానుంది. శ్రేష్ఠ మూవీస్ బ్యానర్ పై సుధాకర్ రెడ్డి - నికిత రెడ్డిలు ఈ చిత్రాన్ని నిర్మించనున్నారు. ఈ మూవీ ఇంకా సెట్స్ పైకి వెళ్ళకుండానే మేర్ల‌పాక గాంధీ మరో సినిమాకి కమిట్మెంట్ ఇచ్చాడని సినీ వర్గాల్లో చెప్పుకుంటున్నారు.

టాలెంటెడ్ హీరో శర్వానంద్ తో 'ఎక్స్ ప్రెస్ రాజా' సినిమా తెరకెక్కించిన గాంధీ.. ఇప్పుడు మరో సినిమా చేయడానికి సన్నాహాలు చేసుకుంటున్నాడాట. ఈ సినిమాని కూడా యూవీ క్రియేషన్స్ బ్యానర్ పై వంశీ - ప్రమోద్ నిర్మించనున్నారట. ముందుగా నితిన్ 'అంధాదున్' తెలుగు రీమేక్ ని పూర్తి చేసి.. వెంటనే శర్వా ప్రాజెక్ట్ పై దృష్టి పెడతాడని తెలుస్తోంది. ప్రస్తుతం 'శ్రీకారం' సినిమాలో నటిస్తున్న శర్వానంద్.. 'ఆడాళ్లు మీకు జోహార్లు' మరియు 'మహా సముద్రం' సినిమాల్లో నటిస్తున్నాడు. అలానే ఓ తెలుగు తమిళ భాషల్లో రూపొందుతున్న బైలింగ్విల్ లో కూడా నటిస్తున్నాడు. వరుస సినిమాలను లైన్ లో పెడుతున్న శర్యా.. యూవీ వారి కోసం ఎప్పుడు డేట్స్ కేటాయిస్తాడో చూడాలి.