టైమ్ మిషన్ లో జర్నీ చేసే చాన్సు వస్తే శర్వా అక్కడకు వెళతాడట

లాజిక్ లేకపోవచ్చు కానీ భావోద్వేగ గాఢత ఉన్న కథను చెబితే.. ప్రేక్షకులు కనెక్టు కావటమే కాదు కచ్ఛితంగా విజయాన్ని ఇస్తారన్న విషయాన్ని ఈ మధ్యనే విడుదలైన 'ఒకే ఒక జీవితం' మూవీ స్పష్టం చేసింది. తాజాగా ఈ మూవీ సక్సెస్ ఫుల్ గా రన్ అవుతోంది. విమర్శకులు సైతం ఓటేసిన ఈ మూవీలో భావోద్వేగం అందరిని ఇట్టే కనెక్టు అయ్యేలా చేసిందని చెప్పాలి. తాజా మూవీతో టైమ్ మిషన్ మీద చర్చ మళ్లీ తెర మీదకు వచ్చింది.

ఈ సినిమాలో టైమ్ మిషన్ లోజర్నీ చేసే హీరో శర్వానంద్.. రియల్ లైఫ్ లో టైం మిషన్ అందుబాటులోకి వస్తే ఏం చేస్తావు? ఎక్కడకు వెళతావు? అన్న ప్రశ్నకు శర్వానంద్ ఆసక్తికర సమాధానాన్ని ఇచ్చాడు. తన జీవితంలో తాను బాగా ఎంజాయ్ చేసింది తన ఇంటర్ రోజులే అని.. అందుకే టైమ్ మిషన్ లో జర్నీ ఛాన్సు వస్తే.. ఆ రోజులకు తాను వెళ్లిపోతానని చెప్పుకొచ్చారు.

తాను ఇంటర్ చదివే రోజుల్లో రేపటి గురించి ఆలోచనే ఉండేది కాదని.. అందుకే టైమ్ మిషన్ లో జర్నీ చేసే అవకాశం వస్తే.. తన ఇంటర్ రోజులకు వెళతానని చెప్పాడు. గాఢతతో ఉన్న పాత్రల్ని చేస్తున్నప్పుడు ఎంత కాదనుకున్నా ఒత్తిడి ఉంటుందని.. ఆ సినిమాలుచేసిన తర్వాత దానిలో నుంచి బయటకు రావటం కాస్త కష్టమేనని.. అందుకే తన డాక్టర్లు సైతం గాఢత ఉన్న పాత్రలు చేయొద్దని చెప్పుకొచ్చారు.

ఏదైనా మూవీలో ఫలానా పాత్ర చేయొద్దని.. చేయాలన్న మాటను తన సహ నటులకు ఎప్పుడూ చెప్పనని.. కానీ.. ఒకే ఒక జీవితం మూవీ సందర్భంగా మాత్రం వెన్నెల కిశోర్ కు మాత్రం.. ఆ సినిమా చేయాలని.. అస్సలు మిస్ కావొద్దని తాను చెప్పి మరీ ఒప్పించినట్లుగా చెప్పారు. ఆ సినిమా మీద తన నమ్మకం నిజమైందన్నారు.