శర్వానంద్ ఏం చేస్తున్నాడు?

తెలుగు ప్రస్తుతమున్న యువ కథానాయకుల్లో మంచి నటులెవరంటే అందులో కచ్చితంగా శర్వానంద్ పేరుంటుంది. ఐతే అతడి కెరీర్ ఎప్పుడూ ఎత్తు పల్లాలతోనే సాగింది. గత ఏడాదికి ముందు వరకు వరుస ఫెయిల్యూర్లతో బాగా దెబ్బతిన్నాడు శర్వా. కానీ ‘రన్ రాజా రన్’ అతడి ఫేట్ మార్చేసింది. కెరీర్ లో అతి పెద్ద కమర్షియల్ సక్సెస్ అందుకున్న శర్వా ఆ తర్వాత వెనుదిరిగి చూసుకోలేదు. ఈ ఏడాది ‘మళ్లీ మళ్లీ ఇది రాని రోజు’ లాంటి మంచి సినిమాతో మరోసారి తన ప్రత్యేకతను చాటుకున్నాడతను.

ఐతే గతంలో తిన్న ఎదురు దెబ్బల వల్ల వచ్చిన అనుభవం వల్లో ఏమో.. ఇంతకుముందులా చేతికి వచ్చిన ప్రతి సినిమానూ ఒప్పేసుకోవట్లేదు శర్వా. ఆచి తూచి సినిమాలు చేస్తున్నాడు. సినిమాకు సినిమాకు గ్యాప్ తీసుకుంటున్నాడు. మళ్లీ మళ్లీ.. విడుదలైన మూణ్నాలుగు నెలలు ఖాళీగా ఉన్న శర్వా ఈ మధ్యే ‘వెంకటాద్రి ఎక్స్ ప్రెస్’ ఫేమ్ మేర్లపాక గాంధీ దర్శకత్వంలో సినిమాను మొదలుపెట్టాడు.

విశేషం ఏంటంటే.. గాంధీ తొలి సినిమా ‘వెంకటాద్రి ఎక్స్ ప్రెస్’, శర్వా కెరీర్ లో అతి పెద్ద సక్సెస్ ‘రన్ రాజా రన్’.. ఇవి రెండూ కలిసొచ్చేలా ఈ సినిమాకు ‘ఎక్స్ ప్రెస్ రాజా’ అని టైటిల్ పెట్టారు. షూటింగ్ చడీ చప్పుడు లేకుండా హైదరాబాదులోనే సాగిపోతోంది. గాంధీ ఫస్ట్ మూవీ తరహాలోనే ఇది కూడా రోడ్ జర్నీ నేపథ్యంలో సాగుతుందని సమాచారం. యువి క్రియేషన్స్ సంస్థ నిర్మిస్తున్న ఈ సినిమాలో శర్వా సరసన సురభి కథానాయికగా నటిస్తోంది. సగానికి పైగా షూటింగ్ పూర్తయింది. ఈ ఏడాది ఆఖర్లో ‘ఎక్స్ ప్రెస్ రాజా’ ప్రేక్షకుల ముందుకొచ్చే అవకాశముంది.