చెయ్యి నొప్పి బాధిస్తున్నా శ‌ర్వా క‌ష్టం

త‌న‌దైన విల‌క్ష‌ణ న‌ట‌న‌తో వెర్స‌టైల్ స్టార్ గా గుర్తింపు పొందారు హీరో శ‌ర్వానంద్. జ‌యాప‌జ‌యాల‌తో సంబంధం లేకుండా వ‌రుస‌గా సినిమాల్లో న‌టిస్తూ కెరీర్ ప‌రంగా క్ష‌ణం తీరిక లేకుండా ఉన్నారు. ప‌డి ప‌డి లేచే మ‌న‌సు- ర‌ణ‌రంగం చిత్రాలు బాక్సాఫీస్ వ‌ద్ద ఆశించిన స్థాయి విజ‌యం సాధించ‌లేదు. అయినా న‌టుడిగా శ‌ర్వాకు మంచి పేరొచ్చింది. `ర‌ణ‌రంగం` చిత్రంలో గ్యాంగ్ స్ట‌ర్ పాత్ర‌లో అత‌డి న‌ట‌ప్ర‌ద‌ర్శ‌న‌కు క్రిటిక్స్ నుంచి ప్ర‌శంస‌లు కురిశాయి. ఎంచుకున్న పాత్ర ఏదైనా వైవిధ్యమైన న‌ట‌న‌తో మెప్పిస్తున్న న‌వ‌త‌రం స్టార్ గా శ‌ర్వాకి ప్ర‌త్యేక గుర్తింపు ద‌క్కింది. ప్ర‌స్తుతం 96 రీమేక్ స‌హా `శ్రీ‌కారం` అనే చిత్రంలోనూ శ‌ర్వానంద్ న‌టిస్తున్నారు.

ఇటీవ‌లే `శ్రీ‌కారం` తొలి షెడ్యూల్ ప్రారంభ‌మైంది. 14 రీల్స్ ఎంట‌ర్ టైన్ మెంట్స్ సంస్థ నిర్మిస్తున్న ఈ చిత్రంతో కిషోర్ రెడ్డి ద‌ర్శ‌కుడిగా ప‌రిచ‌యం అవుతున్నారు. ఈ చిత్రంలో శ‌ర్వానంద్ రైతు పాత్ర‌లో న‌టిస్తున్నారు. తాజాగా హైద‌రాబాద్ ప‌రిస‌రాల్లో షూటింగ్ ప్రారంభ‌మైంది. అయితే ఈ షూటింగ్ కి వెళుతున్నా.. శ‌ర్వా చాలానే జాగ్ర‌త్త‌లు తీసుకోవాల్సి వ‌స్తోంద‌ట‌.

విదేశాల్లో స్కైడైవింగ్ ప్రాక్టీస్ చేస్తుండ‌గా శ‌ర్వానంద్ కి గాయ‌మైన సంగ‌తి తెలిసిందే. ఆ యాక్సిడెంట్ శ‌ర్వాని చాలానే డిస్ట్ర‌బ్ చేసింద‌ని అర్థ‌మ‌వుతోంది. శ‌స్త్ర చికిత్స విజ‌య‌వంతంగా పూర్త‌యినా.. గాయం మానేందుకు చాలానే స‌మ‌యం ప‌డుతోంది. పాత గాయం ఇంకా పూర్తి స్థాయిలో రిలీఫ్ ని ఇవ్వ‌లేదు. దాంతో అత‌డు చెయ్యి ఎత్త‌లేని ప‌రిస్థితిలో ఆ నొప్పితోనే షూటింగ్ లో పాల్గొంటున్నాడు. ఓవైపు 96 పెండింగ్ షూటింగ్ ని పూర్తి చేయాల్సి ఉంది. ఈలోగానే `శ్రీ‌కారం` సెట్స్ లో జాయిన్ అయ్యి బిజీగా ఉన్నారు. ఆ మేర‌కు క్లోజ్ సోర్స్ నుంచి స‌మాచారం అందింది.