శతమానం.. షూటింగ్ సంపూర్ణం!!

సంక్రాంతి సక్సెస్ కోసం చిరు-బాలయ్య పోటీ పడుతుంటే.. రేసులో నేనూ ఉన్నానని ముందునుంచి చెబుతున్న కుర్ర హీరో శర్వానంద్. విపరీతమైన పోటీ మధ్యే వచ్చినా.. ఈ ఏడాది ఎక్స్ ప్రెస్ రాజా సక్సెస్ కొట్టినట్లే.. వచ్చే ఏడాది కూడా అలాంటి పోటీ ఉన్నా నెట్టుకురాగలననే ధీమా వ్యక్తం చేస్తున్నాడు. అందుకే శతమానం భవతి చిత్రాన్ని రేసులో ఉంచాడు.

ఇప్పుడు శతమానం భవతి షూటింగ్ పూర్తయిపోయిందని యూనిట్ వర్గాలు చెబుతున్నారు. నవంబర్ 28తో షూటింగ్ పూర్తయిపోతుందంటూ రెండు వారాల ముందే అనౌన్స్ చేసిన మూవీ యూనిట్.. రెండు రోజులు ఆలస్యం అయితేనేమి.. గుమ్మడికాయ కొట్టేశామని చెప్పేసింది. ఇక పోస్ట్ ప్రొడక్షన్ పనులు మాత్రమే పెండింగ్ ఉండడం.. ఇంకా రిలీజ్ అనుకున్న డేట్ కి 45 రోజులు గడువు ఉండడంతో.. సంక్రాంతికి శర్వా శతమానం భవతి రిలీజ్ ఖాయం అని అర్ధమైపోతోంది. సతీష్ వేగేశ్న దర్శకత్వంలో దిల్ రాజు నిర్మించిన ఈ చిత్రంలో.. అనుపమా పరమేశ్వరన్ హీరోయిన్ గా నటిస్తోంది.

మెగాస్టార్ మూవీ ఖైదీ నెంబర్ 150 మాస్ మసాలా ఎంటర్టెయినర్ కావడం.. బాలకృష్ణ నటిస్తున్న గౌతమి పుత్ర శాతకర్ణి చారిత్రక చిత్రం కావడంతో.. వీటి మధ్య వచ్చిన కుటుంబ కథా చిత్రం శతమానం భవతికి ఢోకా ఉండదన్నది ఇండస్ట్రీ వర్గాల అంచనా.


Like Us on Facebook : https://www.facebook.com/Tupakidotcom/