'షెహజాదా' ఫస్ట్ లుక్ టీజర్: బన్నీ సినిమాని యదతదంగా దింపేస్తున్నారా..?

తెలుగులో ఘన విజయం సాధించిన 'అల వైకుంఠపురములో' చిత్రాన్ని హిందీలో రీమేక్ చేస్తున్న సంగతి తెలిసిందే. ''షెహజాదా'' అనే పేరుతో రీమేక్ చేస్తున్న ఈ సినిమాలో బాలీవుడ్ స్టార్ కార్తీక్ ఆర్యన్ - 'ఆదిపురుష్' భామ కృతి సనన్ హీరోహీరోయిన్లుగా నటిస్తున్నారు. డేవిడ్ ధావన్ ఈ చిత్రానికి దర్శకత్వం వహిస్తున్నారు.

నేడు హీరో కార్తీక్ ఆర్యన్ పుట్టిన రోజు సందర్భంగా శుభాకాంక్షలు తెలుపుతూ మేకర్స్ 'షెహజాదా' ఫస్ట్ లుక్ టీజర్ ని లాంచ్ చేసారు. అతను ఇంటికి తిరిగి వచ్చాడు అంటూ కార్తీక్ ఆర్యన్ గుర్రం మీద రావడంతో ఈ టీజర్ ప్రారంభం అవుతుంది. ఫ్యామిలీలోకి వచ్చిన తర్వాత డిస్కషన్స్ ఏం లేవు.. యాక్షన్ మాత్రమే అంటూ రౌడీలతో ఫైట్ చేస్తున్నాడు.

రీమేక్ అనగానే హిందీ జనాల సెన్సిబిలిటీస్ కి తగినట్లుగా స్క్రిప్ట్ లో ఏమైనా మార్పులు చేర్పులు చేసుంటారని అందరూ భావించారు. కానీ టీజర్ లో సెటప్ అంతా చూస్తుంటే.. యదతదంగా తెలుగునే ఫాలో అయిపోయినట్లు అనిపిస్తుంది. హీరో పాత్ర పేరు బంటు దగ్గర నుంచి డ్రెస్సింగ్ స్టైల్ - ఫైట్ సీన్స్ వరకూ అన్నీ మన తెలుగు చిత్రాన్ని గుర్తు చేస్తున్నాయి.

'షెహజాదా' అంటే యువరాజు అని అర్థం. కథకు తగ్గట్లుగా టైటిల్ ఫిక్స్ చేసారు. టీజర్ లో విజువల్స్ మరియు సెటప్ అంతా చాలా రిచ్ గా ఉంది. బంటుగా కార్తీక్ ఆర్యన్ తనదైన శైలిలో ఆకట్టుకున్నాడు. హీరోయిన్ కృతి సనన్ కూడా ఈ వీడియోలో భాగమైంది. ఆమె ఈ టీజర్ లో ఎంతో గ్లామరస్ గా కనిపించింది.

'షెహజాదా' చిత్రంలో సీనియర్ నటి మనీషా కొయిరాల - పరేష్ రావల్ - రోనీత్ బోస్ రాయ్ - అంకుర్ రాథీ - సన్నీ హిందూజా తదితరులు ఇతర ప్రధాన పాత్రలు పోషిస్తున్నారు. మాతృకలో ఉన్న సచిన్ కేడేఖర్ కూడా హిందీ రీమేక్ లో భాగమయ్యారు.

తెలుగులో త్రివిక్రమ్ శ్రీనివాస్ దర్శకత్వంలో అల్లు అర్జున్ - పూజాహెగ్డే హీరోహీరోయిన్లుగా 'అల వైకుంఠపురములో' చిత్రం తెరకెక్కింది. గీతా ఆర్ట్స్ - హారిక & హాసిని క్రియేషన్స్ బ్యానర్స్ పై రూపొందిన ఈ సినిమా 2020 లో బ్లాక్ బస్టర్ సక్సెస్ అయింది. ఇప్పుడు టాలీవుడ్ నిర్మాతలు బాలీవుడ్ తో కలిసి హిందీ రీమేక్ ని నిర్మిస్తున్నారు.

గుల్షన్ కుమార్ & అల్లు అరవింద్ సమర్పణలో అల్లు ఎంటెర్టైన్మెంట్స్ - హారిక & హాసిని క్రియేషన్స్ - టీ సిరీస్ - బ్రాత్ ఫిలిమ్స్ సంస్థలు కలిసి ''షెహజాదా'' చిత్రాన్ని నిర్మిస్తున్నాయి. భూషణ్ కుమార్ - కిషన్ కుమార్ - ఎస్ రాధాకృష్ణ - భూషణ్ కుమార్ - అమన్ గిల్ నిర్మాతలుగా వ్యవహరిస్తున్నారు. ప్రీతమ్ సంగీతం సమకూర్చారు.

'షెహజాదా' చిత్రాన్ని ముందుగా 2022 నవంబర్ 4న విడుదల చేయాలని అనుకున్నా.. ఫైనల్ గా 2023 వాలెంటైన్స్ వీక్ లో ఫిబ్రవరి 10వ తారీఖున ప్రేక్షకుల ముందుకు తీసుకురానున్నట్లు ప్రకటించారు. తెలుగులో బ్లాక్ బస్టర్ గా నిలిచిన ఫ్యామిలీ ఎంటర్టైనర్.. హిందీలో ఎలాంటి సక్సెస్ అందుకుంటుందో చూడాలి.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.