శిల్పాశెట్టి - రాజ్ కుంద్రాలపై టాలీవుడ్ హీరోయిన్ ఫిర్యాదు..!

బాలీవుడ్ నటి శిల్పా శెట్టి మరియు ఆమె భర్త, వ్యాపారవేత్త రాజ్‌ కుంద్రా గత కొంతకాలంగా వార్తల్లో నిలుస్తున్నారు. పోర్నోగ్రఫీ రాకెట్‌ కేసులో ఇటీవల రాజ్‌ కుంద్రా అరెస్ట్ అయిన విషయం తెలిసిందే. నటనపై ఆసక్తితో వచ్చిన వారిని బెదిరించి అశ్లీల చిత్రాలను తీసి పలు యాప్స్‌ లో రిలీజ్ చేస్తున్నారనే ఆరోపణలతో రాజ్‌ కుంద్రాను పోలీసులు అదుపులోకి తీసుకున్నారు. దాదాపు రెండు నెలల పాటు జైలు జీవితం గడిపిన రాజ్ కుంద్రా ప్రస్తుతం బెయిల్‌ పై బయట ఉన్నాడు. అప్పటి నుంచీ ఈ సెలబ్రిటీ కపుల్ ఏదొక విధంగా వార్తల్లో ఉంటూనే ఉన్నారు.

తాజాగా శిల్పాశెట్టి మరియు రాజ్ కుంద్రా లపై హీరోయిన్, మోడల్ షెర్లిన్ చోప్రా పోలీసులకు ఫిర్యాదు చేసింది. రాజ్ కుంద్రా అరెస్టు అయినప్పటి నుంచి అతనిపై తీవ్రమైన ఆరోపణలు చేస్తూ వస్తున్న షెర్లిన్.. రాజ్ కుంద్రా - శిల్పా శెట్టి తనని మోసం చేసారని.. మానసిక వేధింపులకు పాల్పడ్డారని ఆరోపిస్తూ అక్టోబర్ 14న పోలీసులను ఆశ్రయించింది. లైంగిక వేధింపులు, నేరపూరిత బెదిరింపులు, మోసం చేశారనే కారణాలతో వారిపై కేసు పెట్టింది. పోలీసులు శిల్పా - రాజ్ కుంద్రా దంపతులపై ఎఫ్ఐఆర్ నమోదు చేసినట్లు తెలుస్తోంది.

రాజ్ కుంద్రాకు అండర్ వరల్డ్‌ తో సంబంధం ఉందని.. వాళ్ళ ద్వారా తనను బెదిరించారని.. లైంగిక వేధింపుల కేసును వెనక్కి తీసుకోకపోతే జీవితం నాశనం అవుతుందంటూ హెచ్చరించారని షెర్లిన్ చోప్రా తెలిపింది. ఇంతకముందు రాజ్ కుంద్రా బలవంతంగా తన ఇంట్లోకి ప్రవేశించి కేసును ఉపసంహరించుకోవాలని బెదిరించాడని ఆమె ఆరోపణలు చేసింది. ఈ క్రమంలో ఇప్పుడు మరోసారి రాజ్ కుంద్రా - శిల్పా శెట్టి లపై షెర్లిన్ చోప్రా ఫిర్యాదు చేయడం సంచలనంగా మారింది. కాగా, హిందీ బిగ్ బాస్ రియాలిటీ షో ద్వారా పాపులర్ అయిన షెర్లిన్ చోప్రా.. తెలుగులో 'ఏ ఫిల్మ్ బై అరవింద్' 'సంథింగ్ స్పెషల్' వంటి చిత్రాల్లో నటించింది.