యాంగ్రీ డాటర్ సినిమాకు బ్రేక్?

కొంత కాలం క్రితం యాంగ్రీ హీరో రాజశేఖర్ కూతురు శివాని అడవి శేష్ జంటగా శంకర్ అనే డెబ్యు డైరెక్టర్ తో ఓ ప్రాజెక్ట్ ప్రారంభించిన సంగతి అందరికి గుర్తే. రాజమౌళి ప్రత్యేకంగా వచ్చి క్లాప్ కొట్టి వెళ్ళాడు. కొంత కాలం సవ్యంగానే జరిగింది కాని తాజా అప్ డేట్ ప్రకారం ఇది మొత్తానికే ఆగిపోయిందని తెలిసింది. ఇప్పటిదాకా తీసిన రషెస్ ఏ మాత్రం సంతృప్తికరంగా లేవని ఒకవేళ ఇలాగే కొనసాగిస్తే చేతిలో ఫ్లోప్ ఖాయమైనట్టే అని భావించిన నిర్మాతలు మొత్తానికి హోల్డ్ లో పెట్టేశారట.

ఈ కారణంగానే అడవి శేష్ గూడచారి 2తో పాటు మేజర్ పనుల్లో బిజీ ఉన్నాడు. శివాని సినిమా జరుగుతున్న టైంలోనే శేష్ కు శంకర్ కు మధ్య ఏవో విభేదాలు వచ్చాయని అప్పట్లో టాక్ నడిచింది. తన పాత్రను పూర్తిగా తగ్గించేసి శివానిని హై లైట్ చేసేలా ఏదో జరుగుతోందని శేష్ కినుక వహించాడని పలు కథనాలు వచ్చాయి. అయితే వాటిని ఖండిస్తూ టీం నుంచి ఎలాంటి ప్రకటన రాలేదు

ఇది హిందిలో సూపర్ హిట్ అయిన 2 స్టేట్స్ రీమేక్. ఆల్రెడీ ప్రూవ్ అయిన సబ్జెక్టు మీద కూడా కాన్ఫిడెన్స్ లేకపోతే అవుట్ పుట్ తేడా కొడుతుంది. ఈ కారణంగానే ఇది త్రిశంకు స్వర్గంలో ఉండిపోయిందట. మరి శివానితో కొత్త సినిమా ఏదైనా చేస్తారా లేక దర్శకుడిని మార్చి 2 స్టేట్స్ ని కంటిన్యూ చేస్తారా అనే క్లారిటీ ప్రస్తుతానికి లేదు.

మరోవైపు శివాని చెల్లి శివాత్మిక మొదటి సినిమా దొరసాని వేగంగా పూర్తవుతోంది. ఇంకో రెండు నెలల్లో విడుదల కూడా కానుంది. ఈ లెక్కన ఒకేసారి ఇండస్ట్రీకి వచ్చినా అక్క కంటే ముందు చెల్లి తెరంగేట్రం చేయబోతోంది. అన్ని మన చేతుల్లోనే ఉండవు అని చెప్పడానికి ఇంత కన్నా ఉదాహరణ ఉంటుందా