'మంకీ మ్యాన్'తో హాలీవుడ్ లోకి తెలుగమ్మాయి..!

గూఢచారి ఫేమ్ శోభిత ధూళిపాళ గురించి తెలుగు ప్రేక్షకులకు ప్రత్యేకంగా చెప్పక్కర్లేదు. ఎందుకంటే శోభిత తెలుగమ్మాయే. తాజాగా ఈ బ్యూటీ హాలీవుడ్ సినిమాలో కనిపించనున్నట్లు తెలిపింది. యాక్టర్ దేవ్ పటేల్ దర్శకుడుగా మారి తెరకెక్కించిన 'మంకీ మ్యాన్' సినిమాతో శోభిత హాలీవుడ్ లో అడుగుపెట్టనుంది. మార్చ్ 12న నెట్‌ఫ్లిక్స్.. మంకీ మ్యాన్‌ సినిమాను త్వరలో విడుదల చేయనున్నట్లు ప్రకటించింది. ఈ సినిమాకు దర్శకత్వం వహించడంతో పాటు దేవ్ పటేల్ నటించాడు. తాజాగా శోభిత ఈ సినిమాకు సంబంధించిన విషయాలను మీడియాతో షేర్ చేసుకుంది. అలాగే సినీప్రేక్షకుల బ్లెస్సింగ్స్ కూడా కావాలని కోరింది. మంకీ మ్యాన్ గురించి మాట్లాడుతూ.. "నేను దాదాపు ఐదేళ్ల క్రితం ఈ సినిమాకోసం ఆడిషన్ లో పాల్గొన్నాను. తర్వాత కొద్దీరోజులకే స్క్రీన్ టెస్ట్ ఉందని కాల్ వచ్చింది.

ఆ రోజు నాకింకా గుర్తుంది. ఎలాగంటే కేన్స్ ఫిల్మ్ ఫెస్టివల్ లో నా ఫస్ట్ ఫిల్మ్ 'రామన్ రాఘవన్ 2.0' ప్రదర్శితం అయింది. ఇన్నేళ్ల తర్వాత ఎన్నో మలుపులు తిరిగి మొత్తానికి మంకీ మ్యాన్ విడుదలకు సిద్ధమైంది. ఈ సినిమాలో నా పాత్ర చాలా కీలకంగా ఉంటుంది. ఓవైపు గ్లామరస్ తో మరోవైపు భావోద్వేగంగా ఉంటుంది" అని చెప్పింది. అయితే మంకీ మ్యాన్ మూవీ ముంబై చుట్టూ తిరుగుతుంది. జైలులో ఉన్న ఖైదీ బయట తనకు సర్వం దూరం చేసినవారి పై ఎలా పగ తీర్చుకున్నాడు అనే కథతో తెరకెక్కింది. త్వరలోనే రిలీజ్ డేట్ ప్రకటిస్తారట. ఇదిలా ఉండగా శోభిత చివరిసారిగా ఘోస్ట్ స్టోరీస్‌లో కనిపించింది. కానీ అమెజాన్ ప్రైమ్ లో విడుదలైన 'మేడ్ ఇన్ హెవెన్‌' సిరీస్ తో గుర్తింపు దక్కించుకుంది. శోభిత.. హిందీ, తమిళం, తెలుగు, మలయాళ చిత్రాల్లో నటించింది. ప్రస్తుతం శోభిత చేతిలో.. మేజర్, దుల్కర్ సల్మాన్ తో కురుప్, తమిళ మాగ్నమ్ ఓపస్ లతో పాటు మేడ్ ఇన్ హెవెన్ సీజన్ 2 కలిగిఉంది. మొత్తానికి తెలుగమ్మాయి ఇంటర్నేషనల్ వైడ్ సత్తా చాటెందుకు సిద్ధమైంది.